കൊച്ചി: ലഹരി മരുന്നു കടത്തു കേസില്‍ ബംഗ്‌ളൂരുവില്‍ പിടിയിലായ മുഹമ്മദ് അനൂപ് കൊച്ചിയിലെ ലഹരിമരുന്ന് ശൃംഖലയിലെ പ്രധാന കണ്ണി.
സിനിമ മേഖലകളിലേക്കും മറ്റു ഡി.ജെ പാര്‍ട്ടികളിലും ലഹരിയെത്തിക്കുന്ന സംഘത്തിലെ പ്രധാന കണ്ണിയാണ് മുഹമ്മദ് അനൂപ് എന്ന് കേന്ദ്ര ലഹരി വിരുദ്ധ അന്വേഷണ ഏജന്‍സി കണ്ടെത്തി.
സിനിമാമേഖലയുമായി ബന്ധപ്പെട്ട പ്രമുഖ താരങ്ങളും ഇയാളുടെ കണ്ണിയിലെ അംഗമാണെന്ന് സൂചന ലഭിച്ചിട്ടുണ്ട്. ഇവരിലേക്കും അന്വേഷണം നീളും.
മുഹമ്മദ് അനൂപിനൊപ്പം പിടിയിലായ സീരിയല്‍ നടി അനിഘയ്ക്കും റിജേഷ് രവീന്ദ്രനും ലഹരി കടത്തില്‍ പ്രധാന പങ്കുണ്ടെന്ന് കണ്ടെത്തിക്കഴിഞ്ഞിട്ടുണ്ട്. ഈ സംഘത്തിന് സ്വര്‍ണക്കള്ളക്കടത്ത് കേസിലെ പ്രതികളായ സ്വപ്ന സുരേഷ്, സന്ദീപ് നായര്‍, കെ.ടി റമീസ് തുടങ്ങിയവരുമായും ബന്ധമുണ്ടെന്ന് അന്വേഷണ സംഘം കണ്ടെത്തിയിട്ടുണ്ട്.
ഈ സാഹചര്യത്തില്‍ മുഹമ്മദ് അനൂപിനെ സ്വര്‍ണക്കടത്ത് കേസ് അന്വേഷിക്കുന്ന എന്‍.ഐ.എയും ചോദ്യം ചെയ്യും. സ്വര്‍ണക്കടത്തിന് വേണ്ട പണം സ്വരൂപിക്കാന്‍ മുഹമ്മദ് അനൂപിന്റെ സഹായം പ്രതികള്‍ തേടിയിട്ടുണ്ടെന്നാണ് വിവരം.