പുതുക്കാട്: വോട്ടെടുപ്പ് ദിവസം രാത്രിയില്‍ തൃക്കൂരില്‍ ഉണ്ടായ അക്രമണങ്ങളില്‍ 19 പേരെ പുതുക്കാട് പൊലിസ് അറസ്റ്റ് ചെയ്തു. സി.പി.എം പ്രവര്‍ത്തകനായ തൃക്കൂര്‍ കാട്ടിപറമ്പില്‍ വിനോദിനെ വെട്ടിപ്പരുക്കേല്‍പ്പിച്ചതാണ് പ്രശ്‌നങ്ങള്‍ക്ക് തുടക്കം.
വിനോദിനെ കൊലപ്പെടുത്താന്‍ ശ്രമിച്ച കേസില്‍ ഏഴു പേരും ഇതേ തുടര്‍ന്ന് ബി.ജെ.പി പ്രവര്‍ത്തകരുടെ വീട് കയറി ആക്രമിച്ച കേസില്‍ ആറുപേരേയുമാണ് പൊലിസ് അറസ്റ്റു ചെയ്തത്.
യുവാവിനെ വെട്ടിയ കേസില്‍ തൃക്കൂര്‍ സ്വദേശികളായ പുല്ലാട്ടുപറമ്പില്‍ വിഷ്ണു, കണ്ണത്തുപറമ്പില്‍ അതുല്‍, കള്ളിയത്ത് അനീഷ്, തയ്യില്‍ സന്തോഷ്, കുഴക്കുംപാടം സുബിന്‍, കണ്ണത്തുപറമ്പില്‍ അക്ഷയ്, മുളങ്ങാട്ടുപറമ്പില്‍ ഹരീഷ് എന്നിവരെയാണ് അറസ്റ്റ് ചെയ്തത്. വീട് കയറി ആക്രമിച്ച കേസില്‍ തൃക്കൂര്‍ സ്വദേശികളായ നെല്ലിശേരി രാകേഷ്, തോട്ടുച്ചിറ വിനീഷ്, മുല്ലയ്ക്കല്‍ വിനീഷ്, കോരപ്പിള്ളി മാരാത്ത് വിവേക്, ആവിയന്‍ ജിജീഷ്, ചുള്ളിപറമ്പില്‍ അഭിജിത്ത് എന്നിവരാണ് അറസ്റ്റിലായത്. സംഭവത്തിന് പിന്നില്‍ രഷ്ട്രീയമില്ലെന്നും വ്യക്തി വൈരാഗ്യമാണെന്നും പുതുക്കാട് പൊലിസ് പറഞ്ഞു. പ്രതികളെ കോടതിയില്‍ ഹാജരാക്കി.