ന്യൂഡല്‍ഹി: റോയല്‍ ചാലഞ്ചേഴ്‌സ് ബാംഗ്ലൂരിനെ ഡല്‍ഹി കാപിറ്റല്‍സ് 16 റണ്‍സിന് പരാജയപ്പെടുത്തി. സ്വന്തം മൈതാനത്ത് നടന്ന മത്സരത്തിലായിരുന്നു ഡല്‍ഹിയുടെ ജയം.
188 റണ്‍സ് വിജയലക്ഷ്യം മറികടക്കാനാകാതെയാണ് റോയല്‍ ചാലഞ്ചേഴ്‌സ് ബാംഗ്ലൂര്‍ ഡല്‍ഹി കാപിറ്റല്‍സിനോട് തോല്‍വി സമ്മതിച്ചത്.

ഡല്‍ഹി നിരയില്‍ രണ്ട് പേര്‍ അര്‍ധ സെഞ്ചുറി കണ്ടെത്തി. 37 പന്തില്‍ നിന്ന് ധവാന്‍ 50 റണ്‍സെടുത്തു. 37 പന്തില്‍ നിന്ന് 52 റണ്‍സെടുത്ത ശ്രേയസ് അയ്യരാണ് ഡല്‍ഹിയുടെ ടോപ് സ്‌കോറര്‍. 10 പന്തില്‍ നിന്ന് പൃഥ്വി ഷാ 18 റണ്‍സും കൂട്ടിച്ചേര്‍ത്തു. 13 പന്തില്‍നിന്ന് 28 റണ്‍സ് നേടിയ റൂഥര്‍ഫോര്‍ഡ് പുറത്താകാതെ നിന്നു.

മറുപടി ബാറ്റിങ്ങിനിറങ്ങിയ ബാംഗ്ലൂരിന് 7 വിക്കറ്റ് നഷ്ടത്തില്‍ 171 റണ്‍സ് എടുക്കാനേ കഴിഞ്ഞുള്ളു. 39 റണ്‍സ് നേടിയ പാര്‍ത്ഥിവ് പട്ടേല്‍ ആണ് ബാംഗ്ലൂരിന്റെ ടോപ് സ്‌കോറര്‍. വിരാട് കോഹ്‌ലിയെ (23) അക്‌സര്‍ പട്ടേലാണ് പുറത്താക്കിയത്. റൂഥര്‍ഫോര്‍ടായിരുന്നു എബിഡിയുടെ (17) വിക്കറ്റ് പിഴുതെടുത്തത്. 16 പന്തില്‍ നിന്ന് 24 റണ്‍സ് നേടിയ ശിവം ഡുബേയെയും ഹെയിന്റിച്ച് ക്ലാസ്സനെയും അമിത് മിശ്ര മടക്കിയതോടെ 111-5 എന്ന നിലയിലേക്ക് റോയല്‍ ചാലഞ്ചേഴ്‌സ് വീണു. 50 റണ്‍സ് കൂട്ടിച്ചേര്‍ക്കുന്നതിനിടെ ബാംഗ്ലൂരിന്റെ അഞ്ച് വിക്കറ്റുകള്‍ നഷ്ടമായി. ആറാം വിക്കറ്റില്‍ ഒത്തുകൂടിയ ഗുര്‍കീരത്ത് സിങ് -മാര്‍ക്കസ് സ്റ്റോയിനിസ് കൂട്ടുകെട്ടാണ് ടീമിനു വേ@ണ്ടി അവസാനവട്ട പോരാട്ടം നടത്തിയത്. അവസാന 24 പന്തില്‍ 52 റണ്‍സണ് വേണ്ടിയിരുന്നത്. ഇഷാന്ത് ശര്‍മ എറിഞ്ഞ 16ാം ഓവറില്‍ 2 ഫോറും ഒരു സിക്‌സും സഹിതം 16 റണ്‍സ് നേടി അവസാന മൂന്നോവറിലെ ലക്ഷ്യം 36 ആക്കി മാറ്റിയെങ്കിലും അവസാനത്തില്‍ ബാംഗ്ലൂരിന് അടിപതറുകയായിരുന്നു.
അവസാന ഓവറില്‍ വിജയിക്കുവാന്‍ 26 എന്ന ശ്രമകരമായ ലക്ഷ്യം തേടിയിറങ്ങിയ ബാംഗ്ലൂരിനു വാഷിംഗ്ടണ്‍ സുന്ദറിനെ നഷ്ടമായി. 32 റണ്‍സുമായി മാര്‍ക്കസ് സ്റ്റോയിനിസ് പുറത്താകാതെ നിന്നപ്പോള്‍ ബാംഗ്ലൂരിനു 16 റണ്‍സ് അകലെ വരെ മാത്രമേ എത്തുവാനായുള്ളു. ജയത്തോടെ പ്ലേ ഓഫിലേക്ക് എത്തുന്ന ര@ണ്ടാമത്തെ ടീമായി മാറി ഡല്‍ഹി. അമിത് മിശ്രയും കാഗിസോ റബാഡയും ഡല്‍ഹിയ്ക്കായി 2 വീതം വിക്കറ്റ് നേടി. ഇഷാന്ത് ശര്‍മ, അക്‌സര്‍ പട്ടേല്‍, ഷെര്‍ഫെയ്ന്‍ റൂഥര്‍ഫോര്‍ഡ് എന്നിവര്‍ ഓരോ വിക്കറ്റും നേടി.