പൂച്ചാക്കല്‍: വിദ്യാര്‍ത്ഥികളെ സ്വകാര്യ ബസില്‍ കയറ്റാന്‍ നാട്ടുകാരുടെ ശ്രമം. ബസുകള്‍ സര്‍വീസ് നിര്‍ത്തിവെച്ച് പ്രതിഷേധിച്ചു. ഇന്നലെ രാവിലെ  ചേര്‍ത്തല അരൂക്കുറ്റി റൂട്ടില്‍ മക്കേക്കവലയില്‍ വെച്ചായിരുന്നു സംഭവം. സ്വകാര്യ ബസുകളില്‍  വിദ്യാര്‍ത്ഥികളെ കയറ്റാത്തതിനെ തുടര്‍ന്ന് നാട്ടുകാര്‍ ബസ് തടഞ്ഞുനിറുത്തി കുട്ടികളെ കയറ്റാന്‍ ശ്രമിക്കുകയായിരുന്നു. വിവരമറിഞ്ഞ ഡി.വൈ.എഫ്.തൈക്കാട്ടുശരി മേഖലാ കമ്മിറ്റിയുടെ നേതൃത്വത്തില്‍ പ്രവര്‍ത്തകരെത്തി വിദ്യാര്‍ത്ഥികളെ ബസില്‍ കയറ്റി കൊണ്ടുപോകണമെന്ന് ആവശ്യപ്പെട്ടു. എന്നാല്‍ ഇവര്‍ കൂട്ടാക്കിയില്ല. സ്ഥലത്ത് സര്‍വ്വീസ് നിര്‍ത്തി വെക്കുകയും മറ്റ് സ്വകാര്യബസുകള്‍ തടഞ്ഞു നിര്‍ത്തി സര്‍വീസ് മുടക്കാന്‍ നിര്‍ബന്ധിക്കുകയും ചെയ്തു.
ഇതേ തുടര്‍ന്ന് വിദ്യാര്ഥികളടക്കമുള്ള യാത്രക്കാര്‍ക്ക് ഏറെ ബുദ്ധിമുട്ടിലായി. മണിക്കൂറുകള്‍ക്കുശേഷം പൂച്ചാക്കല്‍ പോലീസ് സ്ഥലത്തെത്തി വിദ്യാര്‍ത്ഥികളുടെ പരാതി സ്വീകരിക്കുകയും സര്‍വീസ് പുനരാരംഭിക്കുകയുമായിരുന്നു. ചേര്‍ത്തല-അരൂക്കുറ്റി റോഡിന്റെ ഇരുവശങ്ങളിലും നിരവധി വിദ്യാഭ്യാസ സ്ഥാപനങ്ങളാണുള്ളത്. രാവിലെയും വൈകുന്നേരവും സ്വകാര്യബസുകള്‍ വിദ്യാര്‍ത്ഥികളെ കയറ്റാതെയും സ്റ്റോപ്പില്‍നിന്നും ദൂരെ മാറ്റി നിറുത്തി വിദ്യാര്‍ത്ഥികളെ ബസിന് പിന്നാലെ ഓടിക്കുന്നതും പതിവാണ്. ഇത് മൂലം അപകടങ്ങളുണ്ടാകുന്നതും നിത്യസംഭവമാണ്. ഡി.വൈ.എഫ്.ഐ.പ്രവര്‍ത്തരായ വിനില്‍, ജി.സുരേഷ്, അനൂപ്, ചന്ദുലാല്‍ എന്നിവര്‍ സമരത്തിന് നേതൃത്വം നല്‍കി.