ബദിയഡുക്ക: ബംഗളൂരുവില്‍നിന്ന് കാസര്‍കോട്ടേക്ക് വരുകയായിരുന്ന സ്വകാര്യ ബസില്‍ നിന്ന് 45.59 ലക്ഷം രൂപയുടെ കുഴല്‍പ്പണം എക്‌സൈസ് പിടികൂടിയ സംഭവവുമായി ബന്ധപ്പെട്ട് ബസിലെ യാത്രക്കാരനായ നെല്ലിക്കുന്നിലെ മുഹമ്മദ് ശഹീറിനെ(33) കാസര്‍കോട് ജുഡിഷ്യല്‍ ഒന്നാംക്ലാസ് മജിസ്‌ട്രേട്ട് കോടതി റിമാന്‍ഡ് ചെയ്തു.
കഴിഞ്ഞദിവസം പുലര്‍ച്ചെ 5.30ന് ആദൂരില്‍ ബദിയടുക്ക എക്‌സൈസ് റേഞ്ച് ഇന്‍സ്‌പെക്ടര്‍ എ. സച്ചിദാനന്ദന്റെ നേതൃത്വത്തില്‍ ബസ് തടഞ്ഞ് പരിശോധിച്ചപ്പോഴാണ് അനധികൃത പണം കണ്ടെത്തിയത്. ബസിലെ യാത്രക്കാരനായ നെല്ലിക്കുന്നിലെ മുഹമ്മദ് ശഹീറിനെ(33) കുഴല്‍പ്പണവുമായി എക്‌സൈസ് അറസ്റ്റ് ചെയ്യുകയായിരുന്നു. കേസ് പിന്നീട് ആദൂര്‍ പൊലിസിന് കൈമാറുകയാണുണ്ടായത്.
ബംഗളൂരുവില്‍നിന്ന് കാസര്‍കോട്ടേക്ക് പുറപ്പെട്ട ബസില്‍ കഞ്ചാവ് കടത്തുന്നുണ്ടെന്ന വിവരമാണ് എക്‌സൈസിന് ലഭിച്ചിരുന്നത്.
ഇതേ തുടര്‍ന്നാണ് എക്‌സൈസ് ആദൂരില്‍ പുലര്‍ച്ചെ വാഹനങ്ങള്‍ തടഞ്ഞ് പരിശോധന നടത്തിയത്.