തിരുവനന്തപുരം: സാമ്പത്തിക പ്രതിസന്ധിയില്‍ ഉഴലുന്ന കെ.എസ്.ആര്‍.ടി.സിയില്‍ അപ്രഖ്യാപിത പിരിച്ചുവിടല്‍. കോച്ച് ബില്‍ഡര്‍, ബ്ലാക്‌സ്മിത്ത്, അപ്പോഴ്‌സര്‍ തസ്തികകളില്‍ ജോലി ചെയ്തിരുന്ന ആയിരത്തോളം എംപാനല്‍ ജീവനക്കാരോട് ഇന്നുമുതല്‍ ജോലിക്ക് ഹാജരാകേണ്ടെന്ന് മാനേജ്‌മെന്റ് ഇന്നലെ നിര്‍ദേശിച്ചു. ഇതിന്റെ അടിസ്ഥാനത്തില്‍ തിരുവനന്തപുരത്തെ സെന്‍ട്രല്‍ വര്‍ക്‌ഷോപ്പില്‍ മാത്രം 55 പേര്‍ക്കാണ് തൊഴില്‍ നഷ്ടമായത്. സംസ്ഥാനത്താകെ ആയിരത്തോളം പേര്‍ക്ക് തൊഴില്‍ നഷ്ടമായി.
മെക്കാനിക്കല്‍ കോച്ച് ബില്‍ഡര്‍, ബ്ലാക്‌സ്മിത്ത്, അപ്പോഴ്‌സര്‍ തസ്തികകളില്‍ പെടുന്നവരോട് കണ്ടക്ടര്‍, ഡ്രൈവര്‍ തസ്തികകളിലേക്ക് അപേക്ഷ നല്‍കാന്‍ നേരത്തെ നിര്‍ദേശിച്ചിരുന്നു. ഹെവി ഡ്രൈവിങ് ലൈസന്‍സുള്ളവര്‍ക്കും കണ്ടക്ടര്‍ ലൈസന്‍സ് ഉള്ളവര്‍ക്കും മാത്രമാണ് ഇത്തരത്തില്‍ അപേക്ഷ നല്‍കാനായത്. ഇങ്ങനെ അപേക്ഷ നല്‍കിയത് 25 പേര്‍ മാത്രമാണ്.
അവര്‍ക്ക് നിയമനം നല്‍കിക്കൊണ്ടുള്ള ഉത്തരവ് കഴിഞ്ഞ ദിവസം പുറത്തിറങ്ങിയിരുന്നു. ഒന്‍പതു വര്‍ഷം വരെ കോച്ച് ബില്‍ഡര്‍, ബ്ലാക്‌സ്മിത്ത്, അപ്പോഴ്‌സര്‍ തസ്തികകളില്‍ ജോലി ചെയ്തിരുന്നവരാണ് ജോലി നഷ്ടപ്പെട്ട് കെ.എസ്.ആര്‍.ടി.സിയില്‍നിന്നും പുറത്താകുന്നത്. കെ.എസ്.ആര്‍.ടി.സിയിലെ പരിഷ്‌കരണ നടപടികളുടെ ഭാഗമായാണ് ഈ പിരിച്ചുവിടലും.
പെയിന്റിങ്ങ് വിഭാഗത്തില്‍പെട്ട എംപാനല്‍ ജീവക്കാരെയും ഡ്രൈവര്‍, കണ്ടക്ടര്‍ തസ്തികകളിലേക്ക് മാറ്റുന്നതിന് ആലോചിച്ചിരുന്നെങ്കിലും എണ്ണത്തില്‍ കുറവായതുകൊണ്ട് ഫിറ്റ്‌നസ് ടെസ്റ്റുകള്‍ മുടങ്ങുമെന്നുകണ്ട് ഒഴിവാക്കുകയായിരുന്നു. മെക്കാനിക്ക്, പെയിന്റര്‍, മിനിസ്റ്റീരിയല്‍ വിഭാഗങ്ങളിലുള്ള എംപാനല്‍ ജീവനക്കാരെ ഈ വര്‍ഷംതന്നെ പൂര്‍ണമായും ഒഴിവാക്കാനാണ് സി.എം.ഡി ടോമിന്‍ തച്ചങ്കരിയുടെ തീരുമാനം. അങ്ങനെയെങ്കില്‍ എംപാനലുകാരായ മൂവായിരത്തോളം പേര്‍ക്ക് ഈ വര്‍ഷം തൊഴില്‍ നഷ്ടമാകും. ഇതിലൂടെ സാമ്പത്തിക ലാഭമാണ് ലക്ഷ്യമിടുന്നത്.