കാസര്‍കോട്: തോണി മറിഞ്ഞു രണ്ടു പേര്‍ക്കു പരുക്കേറ്റു. മത്സ്യത്തൊഴിലാളികളായ തൃക്കണ്ണാട്ടെ കുഞ്ഞിക്കണ്ണന്‍ (51), ചന്ദ്രന്‍ (32) എന്നിവര്‍ക്കാണ് പരുക്കേറ്റത്. കോട്ടിക്കുളം തൃക്കണ്ണാട് കടലിലാണ് ഇവര്‍ സഞ്ചരിച്ച തോണി മറിഞ്ഞത്. ഇന്നലെ രാവിലെ 11 ഓടെയാണ് സംഭവം. ഇരുവരേയും കാസര്‍കോട് ജനറല്‍ ആശുപത്രിയില്‍ പ്രവേശിപ്പിച്ചു. ഇവര്‍ സഞ്ചരിച്ച  ഫൈബര്‍ തോണിയില്‍ തൃക്കണ്ണാട് കടപ്പുറത്തു നിന്നു ഒന്‍പതു പേരടങ്ങുന്ന സംഘമാണ്  മത്സ്യ ബന്ധനത്തിനു പോയത്. തോണി കടലിലിറക്കി അല്‍പ്പ ദൂരം പിന്നിട്ടപ്പോള്‍ കടലില്‍ ശക്തമായ തിരയില്‍ പെട്ടാണ് അപകടം സംഭവിച്ചത്.
തിരയില്‍ പെട്ടു മുങ്ങുകയായിരുന്ന കുഞ്ഞിക്കണ്ണന്‍, ചന്ദ്രന്‍ എന്നിവരെ മറ്റു തൊഴിലാളികള്‍ ചേര്‍ന്നു രക്ഷപ്പെടുത്തി ആശുപത്രിയില്‍ പ്രവേശിപ്പിക്കുകയായിരുന്നു. അപകടത്തില്‍  ഫൈബര്‍ തോണിയുടെ എന്‍ജിനു നാശം സംഭവിച്ചതായി തൊഴിലാളികള്‍ പറയുന്നു.