ന്യൂഡല്‍ഹി: ഇന്ത്യയില്‍ സാമ്പത്തിക തട്ടിപ്പ് നടത്തി മുങ്ങിയ കേസില്‍ നീരവ് മോദിയെ ഇന്ത്യക്ക് വിട്ടുകൊടുക്കണമെന്ന ഇന്ത്യയുടെ അപേക്ഷയ്‌ക്കെതിരേ സുപ്രിംകോടതി മുന്‍ ജഡ്ജി ജസ്റ്റിസ് മാര്‍ക്കണ്ഡേയ കട്ജു ലണ്ടന്‍ കോടതി മുമ്പാകെ ഇന്ന് ഹാജരായി സാക്ഷി പറയും.
നീരവ് മോദിക്ക് ഇന്ത്യയില്‍ നീതിപൂര്‍വമായ വിചാരണ ലഭ്യമാകില്ലെന്നായിരിക്കും താന്‍ കോടതിയെ അറിയിക്കുകയെന്ന കട്ജു പറഞ്ഞു. ഇന്ത്യയില്‍ നീരവ് മോദി മാധ്യമവിചാരണ നേരിടേണ്ടി വരുമെന്നും രാജ്യത്ത് നീരവ് മോദിയോട് ശത്രുതാനിലപാടുള്ളതായും കോടതിയെ അറിയിക്കുമെന്നും കട്ജു പറഞ്ഞു. ലണ്ടനിലെ വെസ്റ്റ് മിനിസ്റ്റര്‍ മജിസ്‌ട്രേറ്റ് കോടതി മുമ്പാകെ വിഡിയോ കോണ്‍ഫറന്‍സ് വഴിയാണ് കട്ജു മൊഴി നല്‍കുക. കേസിന്റെ മെറിറ്റിനെക്കുറിച്ച് താന്‍ സംസാരിക്കില്ലെന്നും കട്ജു പറഞ്ഞു. നിയമമന്ത്രി രവിശങ്കര്‍ പ്രസാദ് നീരവ് മോദിക്കെതിരേ പരസ്യപ്രസ്താവന നടത്തിയിട്ടുണ്ട്.
ഒരാളെ നിയമമന്ത്രി കുറ്റക്കാരനെന്ന് വിധിച്ചാല്‍ പിന്നെങ്ങനെ അയാള്‍ക്ക് കോടതി നീതി ലഭ്യമാക്കുമെന്ന് വിശ്വസിക്കാന്‍ കഴിയുമെന്നും മാര്‍ക്കണ്ഡേയ കട്ജു പറഞ്ഞു.