ചെറുവത്തൂര്‍: പിലിക്കോട് ഉത്തരമേഖല കാര്‍ഷിക ഗവേഷണ കേന്ദ്രം അസോസിയേറ്റ് ഡയരക്ടര്‍  അബ്ദുല്‍ കരീമിനെ ഡി.വൈ.എഫ്.ഐ പ്രവര്‍ത്തകര്‍ ഉപരോധിച്ചു. കാഷ്വല്‍ തൊഴിലാളികളുടെ  നിയമന ഉത്തരവ് അട്ടിമറിക്കാനുള്ള നീക്കത്തില്‍ പ്രതിഷേധിച്ച് ഡി.വൈ.എഫ്.ഐ തൃക്കരിപ്പൂര്‍ ബ്ലോക്ക് കമ്മിറ്റിയുടെ നേതൃത്വത്തിലായിരുന്നു ഉപരോധിച്ചത്.   
ഒഴിവുകള്‍ നികത്തണമെന്നാവശ്യപ്പെട്ട് റാങ്ക് ഹോള്‍ഡേഴ്‌സ് അസോസിയേഷന്‍ മുഖ്യമന്ത്രിക്കും വകുപ്പ് മന്ത്രിക്കും നിവേദനം നല്‍കിയതിനെ തുടര്‍ന്ന് 25 സ്ത്രീകളേയും 18 പുരുഷന്‍മാരേയും കരാര്‍ തൊഴിലാളികളായി നിയമിക്കണമെന്ന് ഉത്തരവിട്ടിരുന്നു.
ഈ ഉത്തരവു നടപ്പിലാക്കാന്‍ ചില ഉദ്യോഗസ്ഥര്‍ വൈമനസ്യം കാണിക്കുകയാണെന്ന് ഡി.വൈ.എഫ്.ഐ ആരോപിക്കുന്നു. ഇന്നലെ  രാവിലെ പത്തുമണിയോടെയാണ്  എ.ഡി.ആറിനെ ഓഫിസ് മുറിയില്‍ ഉപരോധിച്ചത്.
ചന്തേരയില്‍ നിന്നു പൊലിസ് എത്തി ഉദ്യോഗസ്ഥരുടെ സാന്നിധ്യത്തില്‍ ചര്‍ച്ച നടത്തി. ഓഗസ്റ്റ് ഒന്നു മുതല്‍ രണ്ടു ഘട്ടങ്ങളിലായി ഉത്തരവില്‍ പറഞ്ഞ മുഴുവന്‍ തൊഴിലാളികള്‍ക്കും നിയമനം നല്‍കുമെന്ന ഉറപ്പിനെ തുടര്‍ന്നു ഒരു മണിക്കൂറിനു ശേഷം സമരം അവസാനിപ്പിച്ചു. ബ്ലോക്ക് പ്രസിഡന്റ് പി.കെ വിനോദ്, സെക്രട്ടറി കെ.പി രാജീവന്‍, രതീഷ് കുതിരുമ്മല്‍, സി.വി ശരത്ത്, കെ.പി സുജിത്ത്, കെ കനേഷ്, വി പ്രദീപന്‍ എന്നിവരുടെ നേതൃത്വത്തിലായിരുന്നു പ്രതിഷേധം.
നിയമനം നടത്തണമെന്നാവശ്യപ്പെട്ട് റാങ്ക് ഹോള്‍ഡേഴ്‌സ്  അസോസിയേഷന്റെ നേതൃത്വത്തിലും കഴിഞ്ഞ ദിവസം കേന്ദ്രത്തിലേക്കു മാര്‍ച്ച് സംഘടിപ്പിച്ചിരുന്നു.