കാബൂള്‍: അഫ്ഗാനിസ്താനിലെ യു.എസ്-നാറ്റോ സേനയുടെ പുതിയ മേധാവിയായി ജനറല്‍ സ്‌കോട്ട് മില്ലര്‍ ചുമതലയേറ്റു. ആഭ്യന്തര യുദ്ധം തകര്‍ത്ത രാജ്യത്ത് പുതിയ സമാധാന പ്രതീക്ഷകളുമായാണ് മില്ലര്‍ എത്തുന്നത്.
2013 മുതല്‍ അഫ്ഗാനിസ്താനിലെ സ്‌പെഷല്‍ ഓപറേഷന്‍ യൂനിറ്റായ ജോയിന്റ് സ്‌പെഷല്‍ ഓപറേഷന്‍സ് കമാന്‍ഡിന്റെ(ജെ.എസ്.ഒ.സി) ചുമതല വഹിച്ചയാളാണ് സ്‌കോട്ട് മില്ലര്‍. ജനറല്‍ ജോണ്‍ നിക്കള്‍സനു പകരക്കാരനായാണ് ഇപ്പോള്‍ അഫ്ഗാനിലെ മൊത്തം സൈനിക ദൗത്യത്തിന്റെ ചുമതല അദ്ദേഹം ഏറ്റെടുക്കുന്നത്. ഏറ്റവും ദീര്‍ഘമായ കാലം യു.എസ്-നാറ്റോ കമാന്‍ഡറായയാള്‍ എന്ന ബഹുമതിയുമായാണ് നിക്കള്‍സന്‍ പെന്റഗണില്‍ തിരിച്ചെത്തുന്നത്.
ശ്രമകരമായ ദൗത്യമാണ് ഏല്‍പിക്കപ്പെട്ടിരിക്കുന്നതെന്ന് കാബൂളില്‍ നടന്ന അധികാരാരോഹണ ചടങ്ങില്‍ സ്‌കോട്ട് മില്ലര്‍ പറഞ്ഞു. ചടങ്ങില്‍ മുതിര്‍ന്ന അഫ്ഗാന്‍ വൃത്തങ്ങളും വിദേശ പ്രതിനിധികളും പങ്കെടുത്തു.