ആന്റിഗ്വ: 2019 ലോകകപ്പിനുള്ള വെസ്റ്റ് ഇന്‍ഡീസ് ടീമിന്റെ വൈസ് ക്യാപ്റ്റനായി ഇടംകൈയന്‍ വെടിക്കെട്ട് ബാറ്റ്‌സ്മാന്‍ ക്രിസ് ഗെയ്‌ലിനെ ചുമതലപ്പെടുത്തി. ക്യാപ്റ്റന്‍ ജേസണ്‍ ഹോള്‍ഡറിനും മറ്റു ടീമംഗങ്ങള്‍ക്കും ആവശ്യമായ നിര്‍ദേശങ്ങള്‍ നല്‍കുകയാകും വെസ്റ്റ് ഇന്‍ഡീസിന്റെ മുന്‍ ക്യാപ്റ്റന്‍ കൂടിയായ ഗെയ്‌ലിന്റെ പ്രധാന ഉത്തരവാദിത്വം.
മൂന്നുവര്‍ഷം 53 ഏകദിന മത്സരങ്ങളില്‍ ടീമിനെ നയിച്ച ഗെയ്ല്‍ 17 വിജയങ്ങളും രാജ്യത്തിന് സമ്മാനിച്ചിട്ടുണ്ട്. വെസ്റ്റ് ഇന്‍ഡീസിനായി 289 ഏകദിന മത്സരങ്ങള്‍ കളിച്ച ഗെയ്ല്‍ ലോകകപ്പിന് ശേഷം രാജ്യാന്തര മത്സരങ്ങളില്‍ നിന്ന് വിരമിക്കുമെന്നാണ് അഭ്യൂഹം. വെസ്റ്റ് ഇന്‍ഡീസിനുവേണ്ടി ലോകകപ്പില്‍ കളിക്കുകയെന്നത് വലിയ ബഹുമതിയാണെന്നും മുതിര്‍ന്ന താരമെന്ന നിലയില്‍ ക്യാപ്റ്റനും മറ്റു കളിക്കാര്‍ക്കും പിന്തുണ കൊടുക്കേണ്ടത് തന്റെ ഉത്തരവാദിത്വമാണന്നെും ഗെയ്ല്‍ വ്യക്തമാക്കി. ഈ ലോകകപ്പില്‍ ഏറ്റവും മികച്ച പ്രകടനം പുറത്തെടുക്കുമെന്നും ഗെയ്ല്‍ പറഞ്ഞു.