മുംബൈ: തനിക്കെതിരേ ഒരു നടി ഉയര്‍ത്തിയ ലൈംഗിക പീഡനാരോപണം നിഷേധിച്ച് സിനിമാ സംവിധായകന്‍ അനുരാഗ് കശ്യപ്. കശ്യപ് തന്നെ ലൈംഗികമായി പീഡിപ്പിച്ചതായി നടി പായല്‍ഘോഷാണ് കഴിഞ്ഞ ദിവസം ഒരു അഭിമുഖത്തിനിടെ ആരോപിച്ചിരുന്നത്. അസംബന്ധമെന്നായിരുന്നു ഇതിനോട് അനുരാഗ് കശ്യപിന്റെ പ്രതികരണം.

വിവിധ വിഷയങ്ങളില്‍ കേന്ദ്രസര്‍ക്കാരിനെയും സംഘ്പരിവാറിനെയും വിമര്‍ശിച്ച് രംഗത്തെത്തുന്നതായാളാണ് അനുരാഗ് കശ്യപ്. തന്നെ നിശബ്ദനാക്കാനുള്ള ശ്രമം നടക്കുന്നുവെന്ന് ആരോപണത്തെക്കുറിച്ച് പ്രതികരിക്കവേ അദ്ദേഹം പറഞ്ഞു. തന്നെ അപമാനിക്കാന്‍ ഒരു സ്ത്രീയെ കുരുക്കേണ്ടതില്ലായിരുന്നെന്നും ആരോപണങ്ങള്‍ അടിസ്ഥാനരഹിതമാണെന്നും വ്യക്തമാക്കിയ അദ്ദേഹം, തന്നെ നിശബ്ദനാക്കാന്‍ സാധിക്കില്ലെന്നും തന്റെ അഭിപ്രായങ്ങള്‍ പൊതുയിടങ്ങളില്‍ വ്യക്തമാക്കുന്നതു തുടരുമെന്നും പറഞ്ഞു.

തന്നെക്കൂടാതെ മറ്റു ചില നടിമാരെയും കശ്യപ് പീഡിപ്പിച്ചതായി പായല്‍ ഘോഷ് ആരോപിച്ചിരുന്നു. ആരോപണത്തെക്കുറിച്ച് പ്രതികരിക്കരുതെന്നാവശ്യപ്പെട്ട് പലരും തന്നെ വിളിച്ചിരുന്നതായി കശ്യപ് വ്യക്തമാക്കുന്നുണ്ട്. അതേസമയം, അനുരാഗ് കശ്യപിനെതിരായ രാഷ്ട്രീയ നീക്കമാണിതെന്ന സംശയം ബലപ്പെട്ടിട്ടുണ്ട്. കശ്യപ് പീഡിപ്പിച്ചെന്നാരോപിച്ച നടി, പ്രധാനമന്ത്രി നരേന്ദ്രമോദി ഇക്കാര്യത്തില്‍ ഇടപെടണമെന്ന അഭ്യര്‍ഥനയും നടത്തിയിട്ടുണ്ട്.