ന്യൂഡല്‍ഹി: അഞ്ച് വര്‍ഷമെടുത്ത് 58രാജ്യങ്ങള്‍ സന്ദര്‍ശിച്ചു. ഇതിനായി ചെലവായത് 517.82 കോടി രൂപയും. ഇത് മറ്റാരുടെയും കാര്യമല്ല, സാക്ഷാല്‍ പ്രധാനമന്ത്രി നരേന്ദ്ര മോദി വിദേശരാജ്യങ്ങള്‍ സന്ദര്‍ശിച്ചതിനു ചെലവായ തുകയാണ്. സര്‍ക്കാര്‍ രാജ്യസഭയില്‍ അറിയിച്ച കണക്കാണിത്.

വിദേശകാര്യ സഹമന്ത്രി വി. മുരളീധരനാണ് പ്രധാനമന്ത്രിയുടെ സന്ദര്‍ശനങ്ങളെ കുറിച്ച് രാജ്യസഭയില്‍ എഴുതിത്തയ്യാറാക്കിയ മറുപടി നല്‍കിയത്. അമേരിക്ക, റഷ്യ, ചൈന എന്നീ രാജ്യങ്ങള്‍ അഞ്ചുതവണ വീതം മോദി സന്ദര്‍ശിച്ചിട്ടുണ്ട്.

ഒന്നിലധികം തവണയാണ് സിംഗപ്പൂര്‍, ജര്‍മനി, ഫ്രാന്‍സ്, ശ്രീലങ്ക, യു.എ.ഇ. തുടങ്ങിയ രാജ്യങ്ങള്‍ സന്ദര്‍ശിച്ചത്. 2019 നവംബര്‍ 13,14 തിയതികളില്‍ ബ്രസീലില്‍ നടന്ന ബ്രിക്സ് സമ്മേളനത്തില്‍ പങ്കെടുക്കാന്‍ നടത്തിയതാണ് ഒടുവിലത്തെ വിദേശയാത്ര.