ആഷിഖ് അലി ഇബ്രാഹിം

മുക്കം: സ്‌പെഷല്‍ പാക്കേജ് നടപ്പാക്കുന്നതിന്റെ ഭാഗമായി ഗ്രാന്റ് വിതരണം നിര്‍ത്തിയതിനെ തുടര്‍ന്ന് സംസ്ഥാനത്തെ സ്‌പെഷല്‍ സ്‌കൂളുകള്‍ പ്രതിസന്ധിയില്‍.
മുഖ്യമന്ത്രിയുടെയും സാമൂഹ്യക്ഷേമ വകുപ്പ് മന്ത്രിയുടെയും നിര്‍ദേശ പ്രകാരം 2017ലാണ് മാനസിക വെല്ലുവിളി നേരിടുന്നവര്‍ക്കായുള്ള സംസ്ഥാനത്തെ അംഗീകൃത സ്‌പെഷല്‍ സ്‌കൂളുകള്‍ക്ക് പ്രത്യേക പാക്കേജ് നടപ്പാക്കാന്‍ തീരുമാനിച്ചത്.
കടുത്ത സാമ്പത്തിക പ്രതിസന്ധി നേരിടുന്ന സ്‌പെഷല്‍ സ്‌കൂളുകളെ സംരക്ഷിക്കുകയെന്ന ലക്ഷ്യത്തോടെയായിരുന്നു സര്‍ക്കാരിന്റെ തീരുമാനം. ഇതിനായി രൂപരേഖ തയാറാക്കുകയും സ്‌കൂളുകള്‍ പരിശോധിച്ച് റിപ്പോര്‍ട്ട് സമര്‍പ്പിക്കുകയും ചെയ്തു.
സംസ്ഥാന സര്‍ക്കാരിന്റെ ഗ്രാന്‍ഡ് വിതരണം സ്‌പെഷല്‍ പാക്കേജ് നടപ്പാക്കുന്നതിന്റെ ഭാഗമായി നിര്‍ത്തിവയ്ക്കാനും തീരുമാനിച്ചു. ലോക്‌സഭാ തെരഞ്ഞെടുപ്പിന് മുന്‍പ് എല്ലാ നടപടികളും പൂര്‍ത്തിയാക്കിയിരുന്നെങ്കിലും ഉദ്യോഗസ്ഥരുടെ അലംഭാവം കാരണം പദ്ധതി ഇതുവരെ നടപ്പായില്ല. ഇതോടെയാണ് പ്രതിസന്ധി രൂപപ്പെട്ടത്.
പുതിയ അധ്യയനവര്‍ഷം തുടങ്ങാനിരിക്കെ സംസ്ഥാനത്തെ മുന്നൂറോളം വരുന്ന സ്‌പെഷല്‍ സ്‌കൂളുകള്‍ എങ്ങനെ മുന്നോട്ടു കൊണ്ടുപോകുമെന്ന ആശങ്കയിലാണ് മാനേജ്‌മെന്റുകള്‍.
തുച്ഛമായ വേതനം ലഭിക്കുന്ന സ്‌പെഷല്‍ സ്‌കൂള്‍ ജീവനക്കാര്‍ക്ക് മാന്യമായ വേതനം വ്യവസ്ഥചെയ്യുന്ന പാക്കേജിന്റെ മന്ദഗതിയില്‍ ജീവനക്കാരും നിരാശയിലാണ്.
പ്രത്യേക പാക്കേജ് എത്രയുംവേഗം നടപ്പാക്കണമെന്ന് സ്‌പെഷല്‍ സ്‌കൂള്‍ എംപ്ലോയീസ് യൂനിയന്‍ സംസ്ഥാന കമ്മിറ്റി ആവശ്യപ്പെട്ടു. പാക്കേജ് ഉടന്‍ നടപ്പാക്കണമെന്നാവശ്യപ്പെട്ട് ബന്ധപ്പെട്ടവര്‍ക്ക് നിവേദനം നല്‍കാനും നടപടിയുണ്ടായില്ലെങ്കില്‍ 29ന് സെക്രട്ടേറിയറ്റ് ഉപരോധിക്കാനും തീരുമാനിച്ചതായി ഭാരവാഹികള്‍ പറഞ്ഞു.