മുത്തങ്ങ : മുത്തങ്ങ എക്‌സൈസ് ചെക്ക്‌പോസ്റ്റില്‍ വെച്ച് എക്‌സൈസ് സര്‍ക്കിള്‍ ഇന്‍സ്‌പെക്ടര്‍ മജു ടി. എമ്മിന്റെ നേതൃത്വത്തിലുള്ള സംഘം വാഹനപരിശോധനക്കിടയില്‍ ലക്ഷങ്ങള്‍ വിലവരുന്ന 30 ഓളം ഈട്ടി തടികള്‍ പിടികൂടി.
കെ. എ 12 എ 3712 നമ്പര്‍ എയ്‌സര്‍ ലോറിയില്‍ ഒളിപ്പിച്ചു കടത്തിയ തടികളാണ് പിടികൂടിയത്. ഉള്ളി ചാക്കുകള്‍ കൊണ്ട് മൂടിയ നിലയിലായിരുന്നു ഈട്ടി തടികള്‍. വാഹനം ഓടിച്ചിരുന്ന മടിക്കേരി സ്വദേശി സിയാദ് (33), കൂടെ ഉണ്ടായിരുന്നതും വാഹനഉടമയുമായ മൈസൂര്‍ സ്വദേശി യഹിയ (42)എന്നിവരെയാണ് പിടികൂടിയത്. തടിയും ലോറിയുമടക്കം സുല്‍ത്താന്‍ ബത്തേരി ഫോറസ്റ്റ് റേഞ്ചിലേക്ക് കൈമാറി. എക്‌സൈസ് സര്‍ക്കിള്‍ ഇന്‍സ്‌പെക്ടര്‍ മജു ടി. എം, എക്‌സൈസ് ഇന്‍സ്പെക്ടര്‍ ജിജി ഐപ്പ് മാത്യു, പ്രിവന്റീവ് ഓഫിസര്‍മാരായ അബ്ദുള്‍ അസീസ്, പ്രകാശ്. പി. എ, സിവില്‍ എക്‌സൈസ് ഓഫീസര്‍ കെ. എം ലത്തീഫ് എന്നിവരടങ്ങിയ സംഘമാണ് പിടികൂടിയത്.