കിളിമാനൂര്‍: കാമുകനാല്‍ ചതിക്കപ്പെട്ട് ജീവനൊടുക്കിയ വിദ്യാര്‍ഥിനിക്ക് പത്താം ക്ലാസ് പരീക്ഷയില്‍ എല്ലാ വിഷയങ്ങള്‍ക്കും എ പ്ലസ്. സ്‌കൂളിലെ 82 പേര്‍ക്ക് എല്ലാത്തിനും എ പ്ലസ് കിട്ടിയപ്പോള്‍ സ്‌കൂളിന് ജില്ലയില്‍ സര്‍ക്കാര്‍ സ്‌കൂളുകളില്‍ ഒന്നാം സ്ഥാനവും. ആത്മാഭിമാനവും സന്തോഷവും ഉണര്‍ത്തുന്ന വാര്‍ത്ത കേള്‍ക്കാന്‍ കാവ്യ കൂട്ടുകാര്‍ക്കൊപ്പം ഇനിയില്ല.
കഴിഞ്ഞ മാസം 21നാണ് പ്ലാവിള വീട്ടില്‍ സുനില്‍ കുമാറിന്റെ മകള്‍ കാവ്യ തൂങ്ങി മരിച്ചത്. സംഭവത്തില്‍ പിന്നീട് വട്ടിയൂര്‍ക്കാവ് പോളിടെക്‌നിക്കിലെ ശ്രീറാമി(23) നെ പൊലിസ് അറസ്റ്റ് ചെയ്തിരുന്നു. ഇയാള്‍ റിമാന്‍ഡിലാണ്. പരീക്ഷയില്‍ പരാജയപ്പെടുമെന്ന ഭീതിയിലാണ് ആത്മഹത്യയെന്ന് ആദ്യം പ്രചരിപ്പിച്ചെങ്കിലും ആരും വിശ്വസിച്ചിരുന്നില്ല.
എട്ടാം ക്ലാസില്‍ പഠിക്കുമ്പോള്‍ മുതല്‍ ശ്രീറാമിനെ അടുത്തറിയാമായിരുന്നു കാവ്യക്ക്. പരീക്ഷാ ഫലം പുറത്ത് വന്നതോടെ കാവ്യ നോവുന്നൊരോര്‍മയാവുകയാണ്.