ന്യൂഡല്‍ഹി: കാര്‍ഷിക ബില്ലുകളില്‍ മാറ്റം വേണമെന്ന ആവശ്യവുമായി ശിരോമണി അകാലി ദളിന് പിന്നാലെ എന്‍.ഡി.എ ഘടകകക്ഷിയായ ജെ.ഡി.യുവും. ബില്ലിലെ ആശങ്കകള്‍ പരിഹരിക്കപ്പെടണമെന്നും കാര്‍ഷികോത്പന്നങ്ങള്‍ക്ക് താങ്ങുവില ഉറപ്പാക്കുന്ന വ്യവസ്ഥകള്‍ ബില്ലില്‍ ഉള്‍പ്പെടുത്തണമെന്നും ജെ.ഡി.യു ജനറല്‍ സെക്രട്ടറി കെ.സി ത്യാഗി ആവശ്യപ്പെട്ടു. ബില്ലുകള്‍ പാസാക്കാന്‍ പാര്‍ലമെന്റില്‍ പിന്തുണച്ചതിന് പിന്നാലെയാണ് ജെ.ഡി.യു നിലപാട് മാറ്റിയിരിക്കുന്നത്. 

ബില്ലുകള്‍ക്കെതിരേ രാജ്യത്ത് ശക്തമായ കര്‍ഷകരോഷം അടുത്തു നടക്കുന്ന ബിഹാര്‍ അസംബ്ലി തെരഞ്ഞെടുപ്പില്‍ പാര്‍ട്ടിക്ക് തിരിച്ചടിയാവുമെന്നതിനാലാണ് ജെ.ഡി.യു നിലപാട് മാറ്റിയതെന്നാണ് കരുതപ്പെടുന്നത്. 

തങ്ങള്‍ ബില്ലിനെ പാര്‍ലമെന്റില്‍ പിന്തുണച്ചെങ്കിലും അകാലിദള്‍ പോലുള്ള എന്‍.ഡി.എ ഘടക കക്ഷികള്‍ക്ക് വ്യത്യസ്തമായ അഭിപ്രായമുണ്ടെന്നത് വസ്തുതയാണെന്ന് ത്യാഗി പറഞ്ഞു. സ്വകാര്യ കമ്പനികള്‍ ഉത്പന്നങ്ങള്‍ വാങ്ങുമ്പോള്‍ അതിന് വിലയുറപ്പാക്കണമെന്ന് നിരവധി കര്‍ഷക സംഘടനകള്‍ ആവശ്യപ്പെട്ടിട്ടുണ്ട്. അതിനാല്‍ താങ്ങുവില നിശ്ചയിക്കുകയും അതിന് താഴെയുള്ള വിലക്ക് ഉത്പന്നങ്ങള്‍ വാങ്ങുന്നത് ശിക്ഷാര്‍മായ കുറ്റമാക്കുകയും വേണം. താങ്ങുവില നിശ്ചയിക്കുന്നത് സ്വാമിനാഥന്‍ കമ്മിഷന്‍ റിപ്പോര്‍ട്ടിന്റെ അടിസ്ഥാനത്തിലായിരിക്കണമെന്നും ത്യാഗി പറഞ്ഞു. 

സ്വകാര്യ ഇടപാടുകാര്‍ തങ്ങളെ ചൂഷണം ചെയ്യുമോയെന്ന പേടി കര്‍ഷകര്‍ക്കുണ്ട്. ഈ ആശങ്ക പരിഹരിക്കപ്പെടണം. പുതിയ നിയമം സര്‍ക്കാരിന്റെ സംഭരണ, പൊതുവിതരണ സംവിധാനങ്ങള്‍ ദുര്‍ബലമാക്കുമെന്ന ആശങ്കയുണ്ടെന്നും ത്യാഗി പറഞ്ഞു.