ന്യൂഡല്‍ഹി: ഇന്ത്യന്‍ ഒളിമ്പിക് അസോസിയേഷന്റെ പ്രത്യേക യോഗത്തില്‍ അവിശ്വാസ പ്രമേയം നേരിടാനിരിക്കെ എതിരാളികള്‍ക്കെതിരെ പരാതിയുമായി കേന്ദ്ര സര്‍ക്കാറിനെ സമീപിച്ച് പ്രസിഡന്റ് പി.ടി. ഉഷ. ഫുട്ബാള്‍ ഫെഡറേഷന്‍ അധ്യക്ഷന്‍ കല്യാണ്‍ ചൗബക്കെതിരെ പി.ടി ഉഷ കേന്ദ്രത്തിന് പരാതി നല്‍കി. ഒളിമ്പിക് അസോസിയേഷന്റെ പ്രവര്‍ത്തനം തടസപ്പെടുത്തുന്നവരോടൊപ്പം ചേര്‍ന്ന് ജോയിന്റ് സെക്രട്ടറിയായ കല്യാണ്‍ ചൗബയും പ്രവര്‍ത്തിക്കുന്നുവെന്നാണ് ഉഷയുടെ പരാതി. 

ഒക്ടോബര്‍ 25ന് ചേരുന്ന ഇന്ത്യന്‍ ഒളിമ്പിക് അസോസിയേഷന്റെ പ്രത്യേക യോഗത്തിന്റെ അജണ്ടയിലാണ് പ്രസിഡന്റ് പി.ടി. ഉഷക്കെതിരായ അവിശ്വാസ പ്രമേയം ചര്‍ച്ച ചെയ്യുമെന്ന് അറിയിച്ചിരിക്കുന്നത്. 25ന് നടക്കുന്ന യോഗത്തിലെ 26ാം അജണ്ടയായാണ് പി.ടി. ഉഷക്കെതിരായ അവിശ്വാസ പ്രമേയം ചര്‍ച്ച ചെയ്യുക. 

ഒളിമ്പിക് അസോസിയേഷന്‍ പ്രസിഡന്റായി നിയമിതയായതിന് പിന്നാലെ എക്‌സിക്യൂട്ടീവ് സമിതിയിലെ അംഗങ്ങളും ഉഷയും നിരന്തരം കൊമ്പുകോര്‍ക്കല്‍ തുടങ്ങിയിരുന്നു. രണ്ട് വര്‍ഷം തികയും മുമ്പ് അവര്‍ക്കെതിരെ സംഘടനക്കുള്ളില്‍ പടയൊരുക്കവും തുടങ്ങി.