കൊളംബോ: മുസ്‌ലിം പള്ളിയും മുസ്‌ലിംകളുടെ കടകളും ആള്‍ക്കൂട്ടം ആക്രമിച്ചതിനെ തുടര്‍ന്ന് ശ്രീലങ്കയിലെ തീരപ്രദേശ പട്ടണമായ ഷാലോയില്‍ കര്‍ഫ്യൂ ഏര്‍പ്പെടുത്തി.
ഇന്ന് പുലര്‍ച്ചെ ആറു വരെ കര്‍ഫ്യൂ തുടരുമെന്ന് അധികൃതര്‍ അറിയിച്ചു. സ്ഥിതിഗതികള്‍ നിയന്ത്രണവിധേയമാക്കാനായി കൂടുതല്‍ സുരക്ഷാ സൈനികരെ പ്രദേശത്ത് വിന്യസിച്ചിട്ടുണ്ട്.
ക്രിസ്ത്യന്‍ ഭൂരിപക്ഷ മേഖലയായ ഇവിടെ ശനിയാഴ്ച കത്തോലിക്ക വിഭാഗവും മുസ്‌ലിംകളും തമ്മില്‍ സംഘര്‍ഷമുണ്ടായിരുന്നു. ഏപ്രില്‍ 21ലെ സ്‌ഫോടനങ്ങളുമായി ബന്ധപ്പെട്ടാണ് രാജ്യത്ത് സാമുദായിക സൗഹാര്‍ദം തകര്‍ന്നിരിക്കുന്നത്. അതിനിടെ മുസ്‌ലിം സഹോദരന്മാരെ ഉപദ്രവിക്കരുതെന്ന് കര്‍ദിനാള്‍ രഞ്ജിത്ത് ക്രൈസ്തവരോട് ആഹ്വാനം ചെയ്തിട്ടുണ്ട്.
മുസ്‌ലിംകളെ സംശയദൃഷ്ടിയോടെ നോക്കുന്നത് അവസാനിപ്പിക്കണമെന്ന് പ്രസിഡന്റ് സിരിസേനയും നിര്‍ദേശിച്ചിട്ടുണ്ട്. 21 ദശലക്ഷം വരുന്ന ശ്രീലങ്കന്‍ ജനസംഖ്യയില്‍ 10 ശതമാനമാണ് മുസ്‌ലിംകള്‍.
ക്രിസ്ത്യാനികള്‍ ഏഴു ശതമാനമാണ്. ബാക്കി ഭൂരിപക്ഷം ബുദ്ധമതക്കാരാണ്.

സലഫി നേതാവ് അറസ്റ്റില്‍

കൊളംബോ: ശ്രീലങ്കയിലെ സ്‌ഫോടനങ്ങളുടെ സൂത്രധാരനായ സഹ്‌റാന്‍ ഹാഷിമുമായി ബന്ധമുണ്ടെന്നു കരുതുന്ന സഊദി മതപണ്ഡിതനെ അന്വേഷണസംഘം അറസ്റ്റ് ചെയ്തു. 60കാരനായ മുഹമ്മദ് അലിയാരാണ് അറസ്റ്റിലായത്. ഇസ്‌ലാമിക് ഗൈഡന്‍സ് സെന്റര്‍ സ്ഥാപിച്ച് അതിനു കീഴില്‍ ഒരു പള്ളിയും മതപാഠശാലയും ലൈബ്രറിയും സഹ്‌റാന്റെ നാടായ കറ്റാന്‍കുടിയില്‍ നടത്തുന്നതിനു നേതൃത്വം കൊടുക്കുന്നത് ഇയാളാണ്. മുസ്‌ലിം ഭൂരിപക്ഷ പ്രദേശമാണിത്. ഇയാള്‍ രാജ്യത്ത് സലഫിസം പ്രചരിപ്പിക്കുന്നതായി പൊലിസ് പറഞ്ഞു.
പിടിയിലായ അലിയാര്‍ക്ക് സഹ്‌റാനുമായി ഉറ്റബന്ധമാണെന്നും ഇരുവരും തമ്മില്‍ സാമ്പത്തിക ഇടപാടുകള്‍ നടന്നിട്ടുണ്ടെന്നും പൊലിസ് പറഞ്ഞു. ചാവേര്‍ ബോംബുകള്‍ക്ക് പരിശീലനം നല്‍കിയതിലും ഇയാള്‍ക്കു പങ്കുണ്ടത്രേ. റിയാദിലെ ഇമാം മുഹമ്മദ് ബിന്‍ സഊദ് ഇസ്‌ലാമിക് സര്‍വകലാശാലയില്‍ നിന്ന് ബിരുദമെടുത്ത അലിയാര്‍ 1990ലാണ് ശ്രീലങ്കയില്‍ മതകേന്ദ്രം തുടങ്ങിയത്. എന്നാല്‍ ഈ കേന്ദ്രത്തിന് പണം കൊടുക്കുന്നതു സംബന്ധിച്ച് സഊദി ഭരണകൂടം പ്രതികരിച്ചിട്ടില്ല.