മട്ടന്നൂര്‍: കണ്ണൂര്‍ അന്താരാഷ്ട്ര വിമാനത്താവളത്തിലൂടെ രാജ്യാന്തര പ്രശസ്തിയിലേക്കുയരുന്ന മട്ടന്നൂരിലെ ജനങ്ങളുടെ ജീവിതനിലവാരം ഉയര്‍ത്തിക്കൊണ്ട് രാജ്യാന്തര നിലവാരത്തിലുള്ള ഷോപ്പിങ് മാളും യാഥാര്‍ഥ്യമാകുന്നു.
പറന്നുയരാന്‍ ഒരുങ്ങുന്ന മട്ടന്നൂരില്‍ ഷോപ്പിങ് വിസ്മയങ്ങള്‍ക്ക് പുത്തന്‍ മിഴിവേകി രാജ്യാന്തര നിലവാരത്തിലുള്ള ഷോപ്പിങ് മാളായ ലിങ്ക്‌സ് മാള്‍ ഇന്ന് പ്രവര്‍ത്തനമാരംഭിക്കും.  
മട്ടന്നൂര്‍-തലശേരി റോഡില്‍ ഒരുലക്ഷം ചതുരശ്ര അടി വിസ്തീര്‍ണത്തിലാണ് ആധുനിക ഷോപ്പിങ്മാള്‍ നിര്‍മിച്ചത്. മള്‍ട്ടിപ്ലക്‌സ് തിയേറ്റര്‍, മലബാറി, ഇന്ത്യന്‍, സൗത്ത് ഇന്ത്യന്‍, ചൈനീസ് വിഭവങ്ങള്‍ ഉള്‍പ്പെടെ ലഭ്യമാകുന്ന വിവിധ ഫുഡ്‌കോര്‍ട്ടുകള്‍, വിവിധ ബ്രാന്‍ഡുകളുടെ ഷോറൂമുകള്‍, ദേശീയ അന്തര്‍ദേശീയ നിലവാരത്തിലുള്ള വസ്ത്ര ശേഖരം, ഗെയിംസ് സോണ്‍ തുടങ്ങിയവ മാളിലുണ്ടാകും. 200 വാഹനങ്ങള്‍ പാര്‍ക്ക് ചെയ്യാനുള്ള സൗകര്യവും മാളിലുണ്ട്. 24 മണിക്കൂര്‍ സെക്യൂരിറ്റിയും മാളിന്റെ പ്രത്യേകതയാണ്. കണ്ണൂര്‍ അന്താരാഷ്ട്ര വിമാനത്താവളത്തില്‍ നിന്ന് മൂന്ന് കിലോമീറ്റര്‍ ദൂരമാണ് മാളിലേക്കുള്ളത്. ഇന്ന് രാവിലെ 11 മണിക്ക് ചലച്ചിത്ര നടന്‍ ഉണ്ണികൃഷ്ണന്‍ നമ്പൂതിരി ഉദ്ഘാടനം ചെയ്യും. സിനിമാ നടി മാളവിക മേനോന്‍ മുഖ്യാതിഥിയാകും. നഗരസഭാ ചെയര്‍മാന്‍ കെ. ഭാസ്‌കരന്‍, മട്ടന്നൂര്‍ സി.ഐ ഷജു ജോസഫ്, സിനിമാ സംവിധായകന്‍ സലീം അഹമ്മദ് പങ്കെടുക്കും.
വന്‍ നഗരങ്ങളില്‍ ലഭ്യമാകുന്ന വ്യാപാര സൗകര്യങ്ങള്‍ ഇനി മട്ടന്നൂര്‍ ലിങ്ക്‌സ് മാളില്‍ കുറഞ്ഞനിര
ക്കില്‍ ലഭ്യമാകുമെന്ന് ലിങ്ക്‌സ് മാള്‍ മാനേജിങ് ഡയരക്ടര്‍ ഇ.കെ ശശി വാര്‍ത്താസമ്മേളനത്തില്‍ പറഞ്ഞു. മാള്‍ പ്രശാന്ത് അസോസിയേറ്റ്‌സാണ് രൂപകല്‍പന ചെയ്തത്. വാര്‍ത്താസമ്മേളനത്തില്‍ ചെയര്‍മാന്‍ മുഹമ്മദലി, എം.ഡി മുസ്തഫ, സുദിഷ്ണ ശശിധരന്‍, കെ.കെ ശ്രീനിവാസന്‍, ബിനോയ് ശശി, ആര്‍ക്കിടെക്റ്റ് പ്രശാന്ത്, അംബരീഷ് പങ്കെടുത്തു.