കഠിനംകുളം: പൊലിസുകാരെ ആക്രമിച്ച് പരുക്കേല്‍പ്പിച്ച ശേഷം വാറണ്ട് പ്രതിയെ കൈവിലങ്ങോട് കൂടി രക്ഷപ്പെടുത്തിയ സംഭവത്തില്‍ രണ്ട് സ്ത്രീകളടക്കം മൂന്നുപേരെ കഠിനംകുളം പൊലിസ് അറസ്റ്റുചെയ്തു.
പുതുക്കുറുച്ച് തെരുവില്‍ തൈവിളാകം വീട്ടില്‍ മുബാറക്(38), തെരുവില്‍ തൈവിളാകം വീട്ടില്‍ സലീമ(48), ബിസ്മിത(23),എന്നിവരെയാണ് കഠിനംകുളം പൊലിസ് അറസ്റ്റുചെയ്തത്. കോടതിയില്‍ ഹാജരാക്കിയ ഇവരെ 14 ദിവസത്തേക്ക് റിമാന്റ് ചെയ്തു. നിരവധി കഞ്ചാവ് കേസില്‍ ഉള്‍പ്പെട്ട വാറണ്ട് കേസിലെ പ്രതിയായ പെരുമാതുറ ഒറ്റപ്പന സ്വദേശി നിസാറാണ് കൈവിലങ്ങുമായി ബൈക്കില്‍ കയറി രക്ഷപ്പെട്ടത്.
കഴിഞ്ഞ ദിവസം രാത്രി പെരുമാതുറ ഒറ്റപ്പന കടപ്പുറത്ത് ഒരുവീടിന് മുന്നില്‍ മദ്യപിച്ച് ബഹളമുണ്ടാക്കുന്നതറിഞ്ഞാണ് പൊലിസ് അവിടെ എത്തിയത്.
കത്തി കാട്ടി ഭീകരാന്തരീക്ഷം സൃഷ്ടിച്ച് നിസാര്‍ പൊലിസുകാരായ കിഷോര്‍, സന്തോഷ് ലാല്‍ എന്നിവരെ ആക്രമിക്കുകയായിരുന്നു. ഇയാളെ പൊലിസ്  കീഴ്‌പ്പെടുത്തി വിലങ്ങണിയിച്ച് ജീപ്പിനടുത്ത് കൊണ്ടുപോയ സമയത്താണ് നിസാറിന്റെ സഹോദരിമാരും ബന്ധുക്കളും കണ്ടാലറിയാവുന്ന 20 പേരും ചേര്‍ന്ന് പ്രതിയെ രക്ഷപ്പെടുത്തുകയായിരുന്നുവെന്ന് പൊലിസ് പറഞ്ഞു.
 പരുക്കേറ്റ പൊലിസുകാര്‍ പിന്നീട് ആശുപത്രിയില്‍ ചികിത്സതേടി.
 കൈവിലങ്ങുമായി രക്ഷപ്പെട്ട പ്രതിക്കുവേണ്ടി ഊര്‍ജ്ജിതമായ അന്വേഷണം നടത്തുന്നുണ്ട്. പൊലിസിനെ ആക്രമിച്ചതിനും പ്രതിയെ രക്ഷപ്പെടുത്താന്‍ സഹായിച്ചതിനും 20 ഓളം പേര്‍ക്കെതിരേ കേസെടുത്തിട്ടുണ്ടെന്ന് കഠിനംകുളം എസ്.ഐ ബിനീഷ് കുമാര്‍ പറഞ്ഞു.