പാലക്കാട്: സുപ്രഭാതം സബ് എഡിറ്ററായിരുന്ന സിദ്ദീഖലി വാഫിയുടെ സ്മരണാര്‍ഥം വര്‍ഷം തോറും നല്‍കിവരുന്ന സിദ്ദീഖലി വാഫി സ്മാരക അവാര്‍ഡ് സുപ്രഭാതം ലേഖകന്‍ ഫൈസല്‍ കോങ്ങാടിന് നല്‍കാന്‍ സിദ്ദീഖലി വാഫി സ്മാരക സമിതി തീരുമാനിച്ചു. മാധ്യമ പ്രവര്‍ത്തന രംഗത്തെ മികവിന് സിദ്ദീഖലി വാഫിയുടെ നാമധേയത്തില്‍ നല്‍കുന്ന നാലാമത് അവാര്‍ഡിനാണ് ഫൈസല്‍ കോങ്ങാട് അര്‍ഹനായത്. 2007ല്‍ മികച്ച അന്വേഷണാത്മക റിപോര്‍ട്ടിങിനുള്ള സംസ്ഥാന സര്‍ക്കാര്‍ അവാര്‍ഡ്, 2020ലെ കോട്ടുമല ബാപ്പുമുസ്‌ലിയാര്‍ സ്മാരക അവാര്‍ഡ് എന്നിവ ലഭിച്ചിട്ടുണ്ട്. അയ്യായിരം രൂപയും പ്രശസ്തി പത്രവും ഫലകവും അടങ്ങുന്നതാണ് അവാര്‍ഡ്. 2020 ഒക്ടോബര്‍ 31ന് പാലക്കാട് നടക്കുന്ന സുപ്രഭാതം പാലക്കാട് എഡിഷന്‍ രണ്ടാം വാര്‍ഷിക ആഘോഷ ചടങ്ങില്‍ അവാര്‍ഡ് നല്‍കും. മൂന്നാമത് സിദ്ദീഖലി വാഫി സ്മാരക അവാര്‍ഡിന് അര്‍ഹനായ വിനയന്‍ പീലിക്കോടിനും ഈ ചടങ്ങില്‍ അവാര്‍ഡ് നല്‍കും.