ബാലുശേരി: കാക്കൂര്‍ ഇലക്ട്രിസിറ്റി സെക്ഷന്‍ പരിധിയില്‍ വരുന്ന നന്മണ്ടയിലും പരിസര പ്രദേശങ്ങളിലും വോള്‍ട്ടേജ് ക്ഷാമം രൂക്ഷമായി.
 ഇതുകാരണം ഗാര്‍ഹിക ഉപഭോക്താക്കളും ചെറുകിട തൊഴില്‍ മേഖലകളും കടുത്ത പ്രതിസന്ധിയിലായി. വോള്‍ട്ടേജ് ക്ഷാമം കാരണം മില്ലുകളും ഇന്‍ഡസ്ട്രിയലുകളും പ്രവര്‍ത്തിപ്പിക്കാന്‍ കഴിയാത്തത് മേഖലയില്‍ വലിയ വെല്ലുവിളിയാണ് ഉയര്‍ത്തുന്നത്. രാത്രി ബള്‍ബുകള്‍ മാത്രമാണ് പ്രവര്‍ത്തിപ്പിക്കാന്‍ കഴിയുന്നത്.
അസഹ്യമായ വേനല്‍ചൂടിന് ആശ്വാസം തരുന്ന ഫാനുകള്‍ പ്രവര്‍ത്തിക്കണമെങ്കില്‍ രാത്രി പന്ത്രണ്ട് കഴിയണം. വോള്‍ട്ടേജ് ക്ഷാമം പരിഹരിക്കുന്നതിന് ട്രാന്‍സ്‌ഫോര്‍മര്‍ സ്ഥാപിക്കണമെന്ന ആവശ്യത്തിന് വര്‍ഷങ്ങളുടെ പഴക്കമുണ്ട്. യൂനിവേഴ്‌സ്റ്റി പരീക്ഷകള്‍ക്ക് തയാറെടുക്കുന്ന വിദ്യാര്‍ഥികളുടെ പഠനത്തേയും വോള്‍ട്ടേജ് ക്ഷാമം സാരമായി ബാധിക്കുന്നതായി ഗുണഭോക്താക്കള്‍ പറയുന്നു.