പയ്യന്നൂര്‍: ജനാധിപത്യത്തിന്റെ വിജയമാണ് ഈ റീപോളിങ്ങെന്ന് കഴിഞ്ഞതവണ വോട്ട് ചെയ്യാനാവാതിരുന്ന പിലാത്തറ യു.പി സ്‌കൂളിലെ വോട്ടറായ ഷാലറ്റ്.

കഴിഞ്ഞ 23ന് നടന്ന ലോക്‌സഭാ തെരഞ്ഞെടുപ്പില്‍ കാസര്‍കോട് മണ്ഡലത്തിലെ 19ാം നമ്പര്‍ ബൂത്തില്‍ വോട്ട് ചെയ്യാനെത്തിയപ്പോള്‍ വോട്ട് നേരത്തേ ചെയ്തുപോയെന്നാണ് പ്രിസൈഡിങ് ഓഫിസര്‍ ഷാലറ്റിനോട് പറഞ്ഞത്. ഒരുമണിക്കൂറിലധികം ക്യൂവില്‍ നിന്നാണു ബൂത്തില്‍ വോട്ട് ചെയ്യാനെത്തിയത്. ഒടുവില്‍ തന്റെ വോട്ട് ചെയ്‌തെന്ന വിവരം കേട്ടപ്പോള്‍ ഏറെ വിഷമിച്ചെന്നും ഷാലറ്റ് പറഞ്ഞു. ഇന്നലെ നടന്ന റീ പോളിങ്ങില്‍ വോട്ട് ചെയ്യാനായി പിലാത്തറ യു.പി സ്‌കൂളില്‍ 19ാം നമ്പര്‍ ബൂത്തില്‍ രാവിലെ എട്ടരയോടെ ഭര്‍ത്താവായ വിനു സെബാസ്റ്റ്യനോപ്പം ഷാലറ്റ് എത്തിച്ചേര്‍ന്നു. നീണ്ട ക്യൂവില്‍ കുറേസമയം കാത്തുനിന്നാണ് ഷാലറ്റ് വോട്ട് ചെയ്തത്.

വോട്ട് ചെയ്ത് പുറത്തിറങ്ങിയ ഷാലറ്റ് മാധ്യമപ്രവര്‍ത്തകരുമായി സന്തോഷംപങ്കു വച്ചു. ജനാധിപത്യത്തിന്റെ വിജയമാണു റീ പോളിങ്. റീ പോളിങ്ങില്‍ വോട്ട് ചെയ്യാന്‍ സാധിച്ചതില്‍ വളരെയധികം സന്തോഷമുണ്ടെന്നും ഷാലറ്റ് പറഞ്ഞു.

മാധ്യമപ്രവര്‍ത്തകരോടു ഷാലറ്റ് സംസാരിക്കുന്നതു കണ്ട സി.പി.എം പ്രവര്‍ത്തകര്‍ പ്രകോപിതരാവുകയും ഷാലറ്റിനു നേരെ തിരിയുകയും ചെയ്തു. സംഘര്‍ഷാവസ്ഥ കണക്കിലെടുത്ത് പൊലിസ് സംരക്ഷണയിലാണ് ഷാലറ്റിനെ സ്‌കൂളിന് പുറത്തെത്തിച്ചത്.