വാഷിങ്ടണ്‍: കൊവിഡ് ബാധിച്ച് ചികില്‍സയിലായിരിക്കെ വാള്‍ട്ടര്‍ റീഡ് സൈനിക ആശുപത്രിയില്‍ നിന്നും പുറത്തുകടന്ന് ട്രംപ് കാര്‍ യാത്ര നടത്തിയത് വിവാദമായി. ഞായറാഴ്ച വൈകീട്ടായിരുന്നു സംഭവം. കാറില്‍ മറ്റു രണ്ടുപേര്‍ കൂടിയുണ്ടായിരുന്നു. തെരഞ്ഞെടുപ്പ് അടുത്തിരിക്കെ അണികളെ ആവേശംകൊള്ളിക്കാനുള്ള ചെറുയാത്രയായിരുന്നെന്നും കൊവിഡ് പ്രോട്ടോകോള്‍ പാലിച്ചിരുന്നെന്നും വൈറ്റ്ഹൗസ് പറയുന്നു.
എന്നാല്‍ പ്രോട്ടോകോള്‍ ലംഘിച്ച് ചികില്‍സയിലുള്ളയാള്‍ പുറത്തുപോയത് ആരോഗ്യവിദഗ്ധരുടെയും പ്രതിപക്ഷത്തിന്റെയും വന്‍ വിമര്‍ശനത്തിന് ഇടയാക്കിയിട്ടുണ്ട്. സ്വന്തം സര്‍ക്കാരിന്റെ പൊതുജനാരോഗ്യ മാനദണ്ഡങ്ങള്‍ പ്രസിഡന്റ് ലംഘിച്ചിരിക്കുകയാണെന്ന് വിമര്‍ശകര്‍ ചൂണ്ടിക്കാട്ടുന്നു.