കയ്പമംഗലം: ജൈവ കൃഷി രീതിയില്‍ മലയാളികള്‍ വീണ്ടും സജീവമായതിനിടയില്‍ നെല്‍കൃഷിയുടെ പാഠം പകര്‍ന്ന് കുരുന്നു വിദ്യാര്‍ഥികള്‍ മാതൃകയാവുന്നു. വിദ്യാര്‍ഥികളുടെ കൂട്ടായ്മയില്‍ ചെന്ത്രാപ്പിന്നി ഈസ്റ്റിലാണ് കരനെല്‍ കൃഷി ആരംഭിച്ചത്.
പ്രദേശത്തെ എല്‍.പി, യു.പി വിദ്യാര്‍ഥികളായ മുഹമ്മദ് റിയാന്‍, അല്‍അമീന്‍, ഇജാസ്, റിസ്‌വാന, ആസിയ നസ്‌റിന്‍, ഫാത്തിമ, സാലിഹ, ഫര്‍സാന, സുമയ്യ, ഫാദിയ, സഹദിയ എന്നീ കുട്ടി കര്‍ഷകരാണ് ജൈവ കൃഷിയുമായി മുന്നിട്ടിറങ്ങിയത്.
ചെന്ത്രാപ്പിന്നി ഈസ്റ്റ് താനത്ത്പറമ്പില്‍ റഫീക്കിന്റെ പത്ത് സെന്റ് സ്ഥലത്താണ് കൃഷി ഭവനില്‍ നിന്നും ലഭിച്ച ജ്യോതി വിത്തുപയോഗിച്ച് കൃഷി തുടങ്ങിയത്. ഇന്നലെ വൈകിട്ട് നടന്ന ചടങ്ങില്‍ ചെന്ത്രാപ്പിന്നി ഈസ്റ്റ് മനാറുല്‍ ഹുദാ മസ്ജിദ് ഖത്തീബ് ജാബിര്‍ മുസ്‌ലിയാര്‍ വിത്ത് വിതച്ച് ഉദ്ഘാടനം ചെയ്തു. പഞ്ചായത്തംഗം എ.കെ ജമാല്‍, എ.വി ജോണ്‍സണ്‍, എം.സി തിലകന്‍ സന്നിഹിതരായിരുന്നു.