ജിദ്ദ: സഊദിയിലെ കൊള്ളക്കാരുടെ വെടിവയ്പ്പില്‍നിന്ന് മലയാളി രക്ഷപ്പെട്ടത് തലനാരിഴയ്ക്ക്്. റിയാദിന് സമീപം സുവൈരിയ എക്സിറ്റ് 25ലാണ് സംഭവം. പത്തനംതിട്ട സ്വദേശി മനീഷ് കുമാറിന് നേരെയാണ് കൊള്ളക്കാര്‍ വെടിയുതിര്‍ത്തത്. സെയില്‍സ്മാനായ മനീഷ് കുമാര്‍ കടയില്‍ സാധനം ഇറക്കിയ ശേഷം തിരിച്ച് കാറിലെത്തി ഡോര്‍ ലോക്ക് ചെയ്ത ഉടന്‍ അക്രമികള്‍ ഓടിയെത്തുകയായിരുന്നു.ഡോര്‍ തുറക്കാന്‍ ശ്രമിച്ചെങ്കിലും പരാജയപ്പെട്ടതോടെ കൊള്ളക്കാര്‍ കാറിന്റെ മുന്നിലെത്തി ചില്ലിന് നേരെ നിറയൊഴിച്ചു. ആദ്യവട്ടം ചില്ല് തകര്‍ന്നില്ല. തുടര്‍ന്ന് ചില്ല് അടിച്ചുതകര്‍ക്കുകയായിരുന്നു. വീണ്ടും വെടിയുതിര്‍ത്തതോടെ മനീഷ് കുമാര്‍ കാര്‍ പിറകിലേക്കെടുത്ത് ഓടിച്ചുപോയി. കൊള്ളക്കാര്‍ എക്സിറ്റ് 19 വരെ കാര്‍ പിന്തുടര്‍ന്നു. മനീഷ് കുമാര്‍ പൊലിസില്‍ പരാതി നല്‍കി.