ജിദ്ദ: ശക്തമായ മഴക്കിടെ റോഡിലൂടെ കുത്തിയൊലിച്ച വെള്ളം തിരിച്ചുവിടുന്നതിന് വിശ്രമരഹിതമായി ജോലി ചെയ്ത ശുചീകരണ തൊഴിലാളിക്ക് നഗരസഭയുടെ ആദരം.

തൊഴിലാളിയെ ആദരിക്കുന്നതിന് മക്ക മേയറാണ് നിര്‍ദേശിച്ചത്. ബുധനാഴ്ച രാത്രി മക്കയില്‍ പെയ്ത മഴക്കിടെയാണ് റോഡിലൂടെ കുത്തിയൊലിച്ച വെള്ളം
ഡ്രൈനേജിലൂടെ തിരിച്ചുവിടുന്നതിന് ശുചീകരണ തൊഴിലാളി തീവ്രശ്രമം നടത്തിയത്.

ഡ്രൈനേജിന്റെ അടപ്പുകള്‍ക്ക് മുകളില്‍ അടിഞ്ഞ് കൂടിയ ചപ്പുചവറുകള്‍ നീക്കം ചെയ്ത് വെള്ളം ഡ്രൈനേജിലൂടെ തിരിച്ചുവിടുകയാണ് തൊഴിലാളി ചെയ്തത്.

മഴയും റോഡിലൂടെ കടന്നുപോയ വാഹനങ്ങളും വകവെക്കാതെയാണ് തൊഴിലാളി റോഡില്‍ നിന്ന് വെള്ളം തിരിച്ചുവിട്ടത്.

ഇതിന്റെ ദൃശ്യങ്ങള്‍ സഊദി പൗരന്‍ ചിത്രീകരിച്ച് സാമൂഹികമാധ്യമങ്ങളില്‍ പോസ്റ്റ് ചെയ്യുകയായിരുന്നു. ദൃശ്യം കണ്ടവരെല്ലാവരും ശുചീകരണ തൊഴിലാളിയുടെ അര്‍പ്പണ ബോധത്തെ പ്രശംസിക്കുകയും തൊഴിലാളിയെ ആദരിക്കണമെന്ന് ആവശ്യപ്പെടുകയും ചെയ്തു. ഇതിനു പിന്നാലെയാണ് തൊഴിലാളിയെ ആദരിക്കാന്‍ മേയര്‍ നിര്‍ദേശിച്ചത്.