മട്ടാഞ്ചേരി: ഒരു പാമ്പ് വീടിന്റെ മുറ്റത്ത് വന്നാല്‍ സാധാരണ എന്ത് ചെയ്യും. അതിനെ വടിയെടുത്ത് അടിച്ച് കൊല്ലും, സാധാരണ നാട്ടില്‍ നടക്കുന്ന സംഭവം പക്ഷേ പാണ്ടിക്കുടിക്കടുത്തുള്ള ഒഴിഞ്ഞ പറമ്പില്‍ വലയില്‍ കുടുങ്ങി പരിക്കേറ്റ പാമ്പിന് ജിതേഷ് എന്ന യുവാവ് രക്ഷകനാവുകയായിരുന്നു.
വലയില്‍ കുരുങ്ങി വൃണങ്ങള്‍ പഴുത്ത നിലയില്‍ കണ്ട മഞ്ഞ ചേരയെ നാട്ടുകാര്‍ കണ്ടെങ്കിലും നിസ്സഹാരായി നോക്കി നില്‍ക്കുവാനേ കഴിഞ്ഞുള്ളു. പാമ്പിനെ രക്ഷിക്കണമെന്ന് ആഗ്രഹമുണ്ടെങ്കിലും പലര്‍ക്കും ധൈര്യം പോരായിരുന്നു. വിവരമറിഞ്ഞ് അമരാവതി സ്വദേശിയായ ജിതേഷ് എത്തുകയായിരുന്നു. വലയില്‍ കുരുങ്ങിയ പാമ്പിനെ ശ്രദ്ധാപൂര്‍വ്വം ജിതേഷ് വലയില്‍ നിന്ന് മോചിപ്പിക്കുകയായിരുന്നു. വലയില്‍ കുരുങ്ങിയതിന്റെ പരിക്ക് മൂലം വൃണങ്ങള്‍ പഴുത്ത നിലയിലായിരുന്ന പാമ്പിനെ ജിതേഷ് മട്ടാഞ്ചേരി മൃഗാശുപത്രിയില്‍ എത്തിക്കുകയായിരുന്നു. ഡോക്ടര്‍ എത്തി പാമ്പിന്റെ ശരീരം മരവിപ്പിച്ച് മുറിവ് തുന്നിക്കെട്ടി മരുന്ന് വയ്ക്കുകയുമായിരുന്നു. ആറ് തുന്നലുകള്‍ പാമ്പിന്റെ മുറിവില്‍ ഇട്ടതായി ജിതേഷ് പറയുന്നു. ഇപ്പോള്‍ പാമ്പ് ചികിത്സയ്ക്ക് ശേഷം ജിതേഷിന്റെ വീട്ടില്‍ സംരക്ഷിക്കുകയാണ്. മുറിവ് ഭേദമായാലുടന്‍ തന്നെ പാമ്പിനെ ലഭിച്ച പ്രദേശത്ത് തന്നെ കൊണ്ടുവിടുമെന്ന് ജിതേഷ് പറയുന്നു. ഇതിനു മുന്‍പും ജിതേഷ് ഇത്തരത്തില്‍ അപകടത്തില്‍ പെട്ട പാമ്പുകളെ സംരക്ഷിച്ചിട്ടുണ്ടെന്ന് നാട്ടുകാര്‍ പറയുന്നു.