റിയാദ്: സഊദിയിൽ എടിഎം മെഷീൻ കവർന്ന കേസിൽ ആറു പ്രതികൾക്ക് 64 വർഷം ജയിൽ ശിക്ഷ വിധിച്ചു. റിയാദ് ക്രിമിനൽ കോർട്ടാണ് കേസിൽ ഉൾപ്പെട്ട ഒരു സ്വദേശി പൗരനും അഞ്ചു വിദേശികൾക്കും ശിക്ഷ വിധിച്ചത്. കേസിൽ അഞ്ചു പ്രതികൾ കൂടിയുണ്ടെകിലും അവർ വിദേശങ്ങളിലാണ്. ഇവരെ ഇന്റർപോളിന്റെ സഹായത്തോടെ സഊദിയിലെത്തിക്കാനാണ് കോടതി തീരുമാനം. നിലവിൽ ശിക്ഷ വിധിച്ച പ്രതികളിൽ വിദേശികളെ ജയിൽ ശിക്ഷാ കാലാവധിക്ക് ശേഷം സഊദിയിലേക്ക് ആജീവനാന്ത വിലക്കോടെ നാട് കടത്താനും വിധിയുണ്ട്.

    കൂടാതെ, എടിഎം മെഷീനിൽ നിന്നും മോഷ്‌ടിച്ച പണത്തിന് സമാനമായ പതിനാല് ലക്ഷം റിയാൽ അടക്കണമെന്നും കുറ്റകൃത്യത്തിൽ ഉപയോഗിച്ച വാഹനങ്ങൾ കണ്ടുകെട്ടുന്നതിനും നിർദേശമുണ്ട്. ഈ വർഷം ഫെബ്രുവരി ഇരുപതിനാണ് പ്രതികൾ എടിഎം മെഷീൻ കവർന്നത്. കവർച്ചക്ക് പുറമെ കള്ളപ്പണം വെളുപ്പിച്ച കേസിലും ഇവർ പ്രതികളാണെന്ന് കോടതി കണ്ടെത്തി. കള്ളപ്പണം വെളുപ്പിച്ചതിലൂടെയുള്ള വരുമാനമായ 700,000  റിയാലും ഇവരിൽ നിന്നും  പിടിച്ചെടുത്തിട്ടുണ്ട്. 

     പതിനൊന്നംഗ സംഘം സ്ഫോടനം നടത്തി എടിഎം തകർത്ത് പണം മോഷിക്കുകയായിരുന്നു. ഇവരിൽ ആറു പ്രതികൾക്കാണ് ശിക്ഷ ചുമത്തിയത്. ഒളിച്ചോടി വിദേശങ്ങളിൽ കഴിയുന്ന  പ്രതികളെ പിടികൂടുന്നതിനായി പബ്ലിക് പ്രോസിക്യൂഷൻ ഇന്റർപോൾ വഴി കൈമാറാനുള്ള അഭ്യർത്ഥനകൾ നൽകിയിട്ടുണ്ടെന്ന് പബ്ലിക് പ്രോസിക്യൂഷൻ വൃത്തങ്ങൾ അറിയിച്ചു.