ന്യൂഡല്‍ഹി: ഇന്ത്യന്‍ ചാരനെന്ന് ആരോപിച്ച് പാക് സൈനിക കോടതി വധശിക്ഷയ്ക്ക് വിധിച്ച കുല്‍ഭൂഷന്‍ ജാദവിന്റെ വധശിക്ഷ സ്‌റ്റേ ചെയ്തു. പാകിസ്താന്‍ സൈനിക കോടതി വിധിച്ച വധശിക്ഷ അന്താരാഷ്ട്ര നീതിന്യായ കോടതിയാണ് സ്‌റ്റേ ചെയ്തത്.

ഇന്ത്യ പാകിസ്താന്റെ നടപടിക്കെതിരേ അന്താരാഷ്ട്ര നീതിന്യായ കോടതിയെ സമീപിക്കുകയായിരുന്നു. വധശിക്ഷ താല്‍ക്കാലികമായി റദ്ദ് ചെയ്യണമെന്നാവശ്യപ്പെട്ട് കോടതി പാക് പ്രധാനമന്ത്രി നവാസ് ഷെരീഫിന് കത്തയച്ചിട്ടുണ്ട്. കഴിഞ്ഞ മാസമാണ് കുല്‍ഭൂഷന് പാക് സൈനിക കോടതി വധശിക്ഷ വിധിച്ചത്.

2016 മാര്‍ച്ച് മൂന്നിന് ബലൂചിസ്താനില്‍ നിന്നാണ് കുല്‍ഭൂഷനെ അറസ്റ്റ് ചെയ്തത്. പാകിസ്താനെതിരേ ചാരവൃത്തി നടത്തിയെന്നും കുല്‍ഭൂഷന്‍ റോ ഏജന്റാണെന്നുമാണ് പാകിസ്താന്റെ ആരോപണം. കുല്‍ഭൂഷനുമേല്‍ ചുമത്തപ്പെട്ട എല്ലാ കുറ്റങ്ങളും തെളിയിക്കപ്പെട്ടതിനാലാണ് വധശിക്ഷയ്ക്ക് വിധിച്ചതെന്നാണ് പാക് ന്യായീകരണം.