കൊച്ചി: മുന്നാക്ക ഇ.ഡബ്ല്യു.എസ് സംവരണത്തിന്റെ പേരിലുള്ള പിടിച്ചുപറിയില്‍നിന്നും മെറിറ്റ് അട്ടിമറി അടക്കമുള്ള വിഷയങ്ങളില്‍നിന്നും ജനശ്രദ്ധ തിരിക്കാനുള്ള ഇടതുസര്‍ക്കാരിന്റെ നീക്കം തിരിച്ചറിയണമെന്ന് മെക്ക സംസ്ഥാന ജനറല്‍ സെക്രട്ടറി എന്‍.കെ അലി അഭ്യര്‍ഥിച്ചു.

വര്‍ഗീയ കക്ഷികളുടെ കുപ്രചാരണങ്ങളാല്‍ മുസ്‌ലിംകള്‍ ആശങ്കയിലാണ്. ഇത്തരം സാഹചര്യം മുതലെടുത്ത് അധഃസ്ഥിത-പിന്നാക്ക വിഭാഗങ്ങളുടെ കൂട്ടായ്മയില്‍നിന്ന്  മുസ്‌ലിംകളെയും പട്ടികവിഭാഗങ്ങളെയും പിന്തിരിപ്പിച്ച് സവര്‍ണ സമ്പന്ന-മുന്നാക്ക സംവരണമായ ഇ.ഡബ്ല്യു.എസില്‍നിന്ന്  ശ്രദ്ധ തിരിച്ചുവിടാനുള്ള തന്ത്രമാണ് സംഘ്പരിവാര്‍ അനുയായികള്‍ നടത്തുന്നത്. 

കേരളത്തിലെ 13 പ്രധാന സര്‍വകലാശാലകളിലായി വൈസ് ചാന്‍സലര്‍, പ്രൊ-വൈസ് ചാന്‍സലര്‍, രജിസ്ട്രാര്‍, പരീക്ഷാ കണ്‍ട്രോളര്‍, ഫിനാന്‍സ് ഓഫിസര്‍ എന്നീ 65 സ്റ്റാറ്റിയൂട്ടറി തസ്തികകളുണ്ട്. 65 സുപ്രധാന പദവികളില്‍ ജനസംഖ്യയില്‍ 27 ശതമാനമുള്ള മുസ്‌ലിംകളുടെ പ്രാതിനിധ്യം മൂന്ന് ആണ്. നിലവിലെ 12 ശതമാനം സംവരണ ക്വാട്ട അനുസരിച്ച് മിനിമം എട്ട് സ്ഥാനങ്ങള്‍ക്ക് അര്‍ഹതയുണ്ടെന്നും അദ്ദേഹം ചൂണ്ടിക്കാട്ടി.