തലശ്ശേരി: യാഥാര്‍ഥ്യം മനസിലാക്കി സി.പി.എം അക്രമരാഷ്ട്രീയത്തിന്റെ പാത വെടിയണമെന്നു നിയുക്ത വടകര ലോക്‌സഭാ എം.പി കെ. മുരളീധരന്‍.
അക്രമപാത വെടിഞ്ഞില്ലെങ്കില്‍ ജനകീയവിധി നടപ്പാക്കാനുള്ള പ്രചാരണ പരിപാടികളുമായി യു.ഡി.എഫ് മുന്നോട്ടുവരും.മേഖലയിലെ അക്രമവുമായി ബന്ധപ്പെട്ട് തലശ്ശേരി സബ്ജയിലില്‍ റിമാന്‍ഡില്‍ കഴിയുന്ന യു.ഡി.എഫ് പ്രവര്‍ത്തകരെ സന്ദര്‍ശിച്ച ശേഷം മാധ്യമപ്രവര്‍ത്തകരോടു സംസാരിക്കുകയായിരുന്നു അദ്ദേഹം. മതവികാരങ്ങളെ മുറിവേല്‍പ്പിച്ച സി.പി.എമ്മിനും കപട ഭക്തികാണിച്ച ബി.ജെ.പിക്കും ജനംകൊടുത്ത ശിക്ഷയാണു കേരളത്തിലെ തെരഞ്ഞെടുപ്പ് വിധി. എല്‍.ഡി.എഫ് തെരഞ്ഞെടുപ്പിലെ തോല്‍വി മനസിലാക്കുന്നതിനു പകരം ജനങ്ങളുടെ തെറ്റിധാരണ കാരണമാണു തങ്ങള്‍ തോറ്റതെന്നു പറഞ്ഞുനടക്കുകയാണ്. തെറ്റിധരിപ്പിക്കാന്‍ നോക്കിയവരെ ജനങ്ങള്‍ തിരിച്ചറിയുകയാണ് ഉണ്ടായതെന്ന് മുരളി പറഞ്ഞു.
ബി.ജെ.പിയുടെ വിശ്വാസം കപടവിശ്വാസമാണെന്നു ജനങ്ങള്‍ തിരിച്ചറിഞ്ഞു. തിരുവനന്തപുരത്ത് ഒരുലക്ഷം വോട്ടിനാണു യു.ഡി.എഫ് ജയിച്ചത്. അവിടെയും ജനങ്ങള്‍ക്കു കാര്യങ്ങള്‍ മനസിലായി. ബി.ജെ.പി മികച്ച പ്രകടനം കാഴ്ചവയ്ക്കുമെന്നു പറഞ്ഞ പ്രദേശങ്ങളിലെല്ലാം ജനം യു.ഡി.എഫിനു വോട്ടുചെയ്തു. ജീവനിലുള്ള പേടികാരണമാണ് വടകരയില്‍ പി. ജയരാജനെ ജനങ്ങള്‍ തോല്‍പ്പിച്ചതെന്നും മുരളീധരന്‍ പറഞ്ഞു.