കോഴിക്കോട് : അമിത ആഗ്രഹങ്ങളാണ് മനുഷ്യരെ വഴി തെറ്റിക്കുന്നതെന്നും ആന്തരിക ശുദ്ധി കൈവരിക്കാന്‍ നാം തയാറാവണമെന്നും കോഴിക്കോട് ഖാസി സയ്യിദ് മുഹമ്മദ് കോയ തങ്ങള്‍ ജമലുല്ലൈലി പറഞ്ഞു. ഖുര്‍ആന്‍ സ്റ്റഡി സെന്റര്‍ സംഘടിപ്പിച്ച റഹ്മത്തുല്ലാ ഖാസിമിയുടെ റമദാന്‍ പ്രഭാഷണ പരിപാടി ഉദ്ഘാടനം ചെയ്ത് സംസാരിക്കുകയായിരുന്നു തങ്ങള്‍. കെ. മോയിന്‍ കുട്ടി മാസ്റ്റര്‍ അധ്യക്ഷനായി. സത്താര്‍ പന്തല്ലൂര്‍ ആമുഖ പ്രഭാഷണം നടത്തി. ഹസൈനാര്‍ ഫൈസി, യൂസുഫ് ബാഖവി കരീറ്റിപ്പറമ്പ്, മുഹമ്മദ് മാസ്റ്റര്‍ മായനാട് സംസാരിച്ചു. വി.കെ ശാഹുല്‍ ഹമീദ് ഫറോക്ക് സ്വാഗതവും അക്ബര്‍ മുക്കം നന്ദിയും പറഞ്ഞു. രണ്ടാം ദിവസമായ ഇന്ന് ഇമാം മഹ്ദി യുടെ ആഗമനം കാത്തിരിപ്പിന് വിരാമം? എന്ന വിഷയത്തില്‍ പ്രഭാഷണം നടത്തും. പാണക്കാട് സയ്യിദ് ഹമീദലി ശിഹാബ് തങ്ങള്‍ ഉദ്ഘാടനം ചെയ്യും. സമാപന ദിവസമായ നാളെ രക്ഷകന്‍ അള്ളാഹു മാത്രം എന്ന വിഷയത്തില്‍ നടക്കുന്ന പ്രഭാഷണ പരിപാടി സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ ഉദ്ഘാടനം ചെയ്യും.