ലണ്ടന്‍: ലോകകപ്പിന് മുന്നോടിയായുള്ള സന്നാഹ മത്സരത്തില്‍ ഇന്ന് ആസ്‌ത്രേലിയയും ശ്രീലങ്കയും ഏറ്റുമുട്ടും.
സതാംപ്ടണിലെ റോസ്ബൗള്‍ ക്രിക്കറ്റ് സ്റ്റേഡിയത്തിലാണ് മത്സരം അരങ്ങേറുന്നത്. നേരത്തെ ദക്ഷിണാഫ്രിക്കയുമായി നടന്ന മത്സരത്തില്‍ ലങ്ക പരാജയപ്പെട്ടിരുന്നു.
ശക്തരായ ഇംഗ്ലണ്ടിനെ പരാജയപ്പെടുത്തിയ ആത്മവിശ്വാസത്തിലാണ് ആസ്‌ത്രേലിയ ഇന്നു കളിക്കാനിറങ്ങുന്നത്. മുന്‍ ക്യാപ്റ്റന്‍ സ്മിത്തിന്റെയും വാര്‍ണറുടെയും മികവില്‍ കഴിഞ്ഞ മത്സരം കൈക്കലാക്കിയ ആസ്‌ത്രേലിയ ഇന്നും തികഞ്ഞ ആത്മ വിശ്വാസത്തിലാണ് മത്സരത്തിനിറങ്ങുന്നത്.
സെഞ്ചുറിയുമായി നിറഞ്ഞാടിയ സ്മിത്തിന്റെ മികവില്‍ ആസ്‌ത്രേലിയ ഇംഗ്ലണ്ടിനെതിരേ മികച്ച സ്‌കോറാണ് കണ്ടെത്തിയത്. ബാറ്റിങ്ങില്‍ മികവ് കാണിക്കുന്ന ഇംഗ്ലണ്ടിനെ ബൗളിങ്ങിലൂടെ പിടിച്ചുകെട്ടിയാണ് ഓസീസ് കഴിഞ്ഞ മത്സരം വിജയിച്ചത്.
എന്നാല്‍ മലിംഗ ഇല്ലാതെയായിരുന്നു ലങ്ക കഴിഞ്ഞ മത്സരം കളിച്ചത്.
നാലു വര്‍ഷത്തിനു ശേഷം ഏകദിന ക്രിക്കറ്റിലേക്ക് മടങ്ങിയെത്തിയ അവരുടെ ക്യാപ്റ്റന്‍ കരുണരത്‌നെ ഫോമിലേക്കുയര്‍ന്നത് ലങ്കയ്ക്ക് പ്രതീക്ഷ നല്‍കുന്നുണ്ട്. വൈകിട്ട് മൂന്നിനാണ് മത്സരം.