തിരുവനന്തപുരം: നിയമസഭാകക്ഷി നേതാവിനെച്ചൊല്ലി കേരള കോണ്‍ഗ്രസില്‍ തര്‍ക്കം രൂക്ഷമാകുന്നതിനിടെ നിലപാട് വ്യക്തമാക്കി സ്പീക്കര്‍ പി. ശ്രീരാമകൃഷ്ണന്‍. നിയമസഭയില്‍ കേരള കോണ്‍ഗ്രസ്എം ന്റെ മുന്‍ നിരയിലെ സീറ്റ് ഒഴിച്ചിടില്ലെന്നും നിയമസഭാ കക്ഷി ഉപനേതാവ് എന്ന നിലയില്‍ മുന്‍ നിരയില്‍ പി.ജെ ജോസഫിനു സീറ്റ് നല്‍കുമെന്നും സ്പീക്കറുടെ ഓഫീസ് അറിയിച്ചു.

പി.ജെ. ജോസഫിനാണ് നിയമസഭകക്ഷി നേതാവിന്റെ ചുമതലയെന്ന് അവകാശപ്പെട്ടുകൊണ്ട് മോന്‍സ് ജോസഫ് എം.എല്‍.എ സ്പീക്കര്‍ക്ക് കത്ത് നല്‍കിയതിന് പിന്നാലെ ഇതിനെ തിരുത്തി റോഷി അഗസ്റ്റിന്‍ എം.എല്‍.എ രംഗത്തെത്തിയിരുന്നു.

പി.ജെ. ജോസഫിന് നിയമസഭകക്ഷി നേതാവിന്റെ ചുമതല നല്‍കിയിട്ടില്ലെന്നും ഡെപ്യൂട്ടി ലീഡറെ പാര്‍ലമെന്ററി പാര്‍ട്ടി നേതാവായി കണക്കാക്കുന്ന കീഴ് വഴക്കം പാര്‍ട്ടിയിലില്ലെന്നും ചൂണ്ടിക്കാട്ടിയാണ് റോഷി അഗസ്റ്റിന്‍ സ്പീക്കര്‍ക്ക് കത്ത് നല്‍കിയത്.