കാണ്‍പൂര്‍: ശ്രേയസ് അയ്യറുടെ തകര്‍പ്പന്‍ പ്രകടനത്തിന്റെ കരുത്തില്‍ ഗുജറാത്ത് ലയണ്‍സിനെതിരേ ഡല്‍ഹി ഡെയര്‍ ഡെവിള്‍സിന് രണ്ട് വിക്കറ്റ് ജയം. ഗുജറാത്ത് ഉയര്‍ത്തിയ 195 റണ്‍സ് വിജയലക്ഷ്യം രണ്ട് ബോള്‍ ശേഷിക്കെയാണ് ഡല്‍ഹി മറികടന്നത്.
57 പന്തില്‍ 15 ഫോറും രണ്ടു സിക്‌സുമടക്കം തകര്‍ത്തു കളിച്ച അയ്യര്‍ സെഞ്ച്വറിക്ക് നാലുറണ്‍സ് അകലെ പുറത്താകുകയായിരുന്നു. 30 റണ്‍സെടുത്ത കരുണ്‍ നായരും 24 റണ്‍സെടുത്ത കമ്മിന്‍സുമാണ് ഡല്‍ഹിയുടെ മറ്റു പ്രധാന സ്‌കോറര്‍മാര്‍. ഗുജറാത്തിനായി ഫോക്‌നര്‍ രണ്ടും കുല്‍ക്കര്‍ണി, സാങ്‌വാന്‍, ബേസില്‍ തമ്പി എന്നിവര്‍ ഓരോ വിക്കറ്റ് വീതവും നേടി.
ആദ്യം ബാറ്റ് ചെയ്ത ഗുജറാത്ത് അഞ്ചു വിക്കറ്റിന് 195 റണ്‍സ് അടിച്ചുകൂട്ടുകയായിരുന്നു. റണ്ണൊഴുകുന്ന പിച്ചില്‍ ടോസ് നേടിയ ഡല്‍ഹി ഗുജറാത്തിനെ ബാറ്റിങ്ങിനയക്കുകയായിരുന്നു. സ്‌കോര്‍ പിന്തുടരുക എന്നത് കാണ്‍പൂരില്‍ എളുപ്പമാണെന്ന് കണ്ടാണ് ഡല്‍ഹി ഫീല്‍ഡിങ് തെരഞ്ഞെടുത്തത്. ബാറ്റ് ചെയ്യാന്‍ ആദ്യം അവസരം ലഭിച്ചെങ്കിലും ഡല്‍ഹിയുടെ ബൗളര്‍മാരെ നേരിടുന്നതില്‍ ഗുജറാത്ത് ആദ്യം പതറി. നാലാം ഓവറില്‍ ഡ്വയിന്‍ സ്മിത്ത്(8) റണ്ണൗട്ടായതോടെ ഗുജറാത്ത് സമ്മര്‍ദത്തിലായി. ഇഷാന്‍ കിഷന്‍(34), സുരേഷ് റെയ്‌ന(6) എന്നിവര്‍ പതിയെ സ്‌കോര്‍ മുന്നോട്ടു കൊണ്ടുപോയെങ്കിലും അധികം വൈകാതെ തന്നെ ഇരുവരും പുറത്തായി. ഇഷാന്‍ കിഷനെ അമിത് മിശ്രയും റെയ്‌നയെ കമ്മിന്‍സും മടക്കി.
പിന്നീടെത്തിയ ആരോണ്‍ ഫിഞ്ച്(69), ദിനേഷ് കാര്‍ത്തിക്(40) എന്നിവര്‍ ചേര്‍ന്നാണ് ഗുജറാത്തിന് കൂറ്റന്‍ സ്‌കോര്‍ സമ്മാനിച്ചത്. ഡല്‍ഹിയുടെ ബൗളര്‍മാരെ ഇരുവരും കടന്നാക്രമിച്ചു. ഫിഞ്ച് 39 പന്തില്‍ ആറു ബൗണ്ടറിയും നാലു സിക്‌സറും അടക്കമാണ് അര്‍ധസെഞ്ച്വറി തികച്ചത്. കാര്‍ത്തിക്കിന്റെ ഇന്നിങ്‌സില്‍ നാലു ബൗണ്ടറിയും ഒരു സിക്‌സറുണ്ടായിരുന്നു.
19ാം ഓവറില്‍ ഫിഞ്ച് പുറത്തായെങ്കിലും രവീന്ദ്ര ജഡേജ(എഴു പന്തില്‍ 13*) ജെയിംസ് ഫോക്‌നര്‍(എട്ടു പന്തില്‍ 14*) എന്നിവര്‍ ചേര്‍ന്ന് ഗുജറാത്തിന്റെ സ്‌കോര്‍ 190 കടത്തുകയായിരുന്നു. ഡല്‍ഹിക്ക് വേണ്ടി മുഹമ്മദ് ഷമി, കമ്മിന്‍സ്, അമിത് മിശ്ര, ബ്രാത്ത്‌വൈറ്റ് എന്നിവര്‍ ഓരോ വിക്കറ്റെടുത്തു.