മുംബൈ: ജാതി അധിക്ഷേപം നേരിട്ടതിനെത്തുടര്‍ന്ന് ദുരൂഹ സാഹചര്യത്തില്‍ മരിച്ച മുംബൈ സ്വദേശിനിയായ ഡോ. പായല്‍ തഡ്‌വിയുടേത് കൊലപാതകമെന്ന സൂചനകളുമായി റിപ്പോര്‍ട്ടുകള്‍. പായലിന്റേത് ആത്മഹത്യയല്ലെന്നും കൊലപാതകമായിരുന്നുവെന്നും പോസ്റ്റ്‌മോര്‍ട്ടം റിപ്പോര്‍ട്ടുകളില്‍ വെളിപ്പെടുത്തുന്നതായി ദേശീയ മാധ്യമങ്ങള്‍ വ്യക്തമാക്കുന്നു.

കഴുത്തിലേറ്റ മുറിവാണ് മരണകാരണമെന്ന് പോസ്റ്റുമോര്‍ട്ടം റിപ്പോര്‍ട്ടില്‍ പറയുന്നു. അതേസമയം പായലിന്റേത് ആത്മഹത്യയെന്നായിരുന്നു പ്രാഥമിക നിഗമനം. സംഭവത്തില്‍ ഉള്‍പ്പെട്ട സീനിയര്‍ വിദ്യാര്‍ഥിനികളായ ഹേമ അഹൂജ, ഭക്തി മെഹ്‌റ, അങ്കിത ഖണ്ഡേവാള്‍ എന്നിവരെ കഴിഞ്ഞദിവസം അറസ്റ്റ് ചെയ്തിരുന്നു. ആത്മഹത്യയല്ല, കൊലപാതകമാണെന്ന വാദവുമായി നേരത്തെ പായലിന്റെ മാതാപിതാക്കള്‍ രംഗത്തെത്തിയിരുന്നു. ഇത് ശരിവയ്ക്കുന്നതാണ് പോസ്റ്റ്‌മോര്‍ട്ടം റിപ്പോര്‍ട്ട്.

ഈ മാസം 22-ാം തിയതിയാണ് മുംബൈയിലെ പ്രശസ്തമായ ബിവൈല്‍ നായര്‍ മെഡിക്കല്‍ കോളജിലെ വിദ്യാര്‍ഥിയായ പായലിനെ മരിച്ച നിലയില്‍ കണ്ടെത്തിയത്. ഗൈനക്കോളജി പി.ജി വിദ്യാര്‍ത്ഥിയായിരുന്നു പായല്‍.