കണ്ണൂര്‍: കെ.പി.സി.സി മുന്‍ അധ്യക്ഷന്‍ വി.എം സുധീരനും കോണ്‍ഗ്രസ് മുഖപത്രമായ വീക്ഷണത്തിനുമെതിരേ രൂക്ഷവിമര്‍ശനവുമായി എ.പി അബ്ദുല്ലക്കുട്ടി. മോദി സ്തുതിയെ തുടര്‍ന്ന് പാര്‍ട്ടിയില്‍നിന്ന് കടുത്ത വിമര്‍ശനം നേരിടുന്നതിനിടെ ഇന്നലെ കണ്ണൂരിലെത്തിയപ്പോഴായിരുന്നു അബ്ദുല്ലക്കുട്ടിയുടെ പ്രതികരണം.
വി.എം സുധീരന്‍ വികസന വിരുദ്ധനാണ്. നാലുവരിപ്പാതാ വികസനത്തിലെ തന്റെ നിലപാടാണ് സുധീരന് തന്നോടുള്ള ശത്രുത.
ഉമ്മന്‍ ചാണ്ടിയെ തോല്‍പ്പിക്കാന്‍ കരുണാകരനോടൊപ്പം കൂട്ടുകൂടിയ ആളാണ് സുധീരന്‍. ഉമ്മന്‍ ചാണ്ടി സര്‍ക്കാരിനെ അട്ടിമറിക്കാന്‍ സുധീരന്‍ ശ്രമിച്ചിരുന്നു.അര ബക്കറ്റ് വെള്ളത്തില്‍ ചായം മുക്കി തലയും മീശയും കറുപ്പിച്ച് ജൈവ കൃഷിയെക്കുറിച്ച് സംസാരിക്കുന്നയാളാണ് അദ്ദേഹം. കോണ്‍ഗ്രസിനെക്കുറിച്ച് അദ്ദേഹം കൂടുതല്‍ തന്നെ പഠിപ്പിക്കേണ്ട. ആദ്യം പുറത്താക്കേണ്ടത് സുധീരനെയാണെന്നും അബ്ദുല്ലക്കുട്ടി പറഞ്ഞു.
തന്റെ വിശദീകരണം കേള്‍ക്കാതെ തന്നെ പുറത്താക്കണമെന്ന് പാര്‍ട്ടി മുഖപത്രമായ വീക്ഷണത്തില്‍ മുഖപ്രസംഗമെഴുതിയ ആളെക്കുറിച്ച് തനിക്കറിയാം.
ഇന്ദിരാ ഗാന്ധിയെ ഹിറ്റ്‌ലറോട് ഉപമിച്ചയാളാണ്. അധികാരത്തിന്റെ അപ്പക്കഷണത്തിനുവേണ്ടി കൂറുമാറ്റം നടത്തിയ ആളാണ് ഇതിനു പിന്നിലെന്നും അബ്ദുല്ലക്കുട്ടി പറഞ്ഞു.