വെഞ്ഞാറമൂട്: തപാല്‍പ്പെട്ടി അനാഥാവസ്ഥയില്‍. വെഞ്ഞാറമൂട് ജങ്ഷനില്‍ പോസ്റ്റാഫിസിന് സമീപം റോഡിനരുകിലായി സ്ഥാപിച്ചിരിക്കുന്ന തപാല്‍പ്പെട്ടിയാണ് നിലംപൊത്താറായ അവസ്ഥയിലുള്ളത്.
 കത്തുകളെ ആശ്രയിക്കുന്നവരുടെ എണ്ണം കുറഞ്ഞെങ്കിലും ദിവസേന ധാരാളം പേരാണ് വെഞ്ഞാറമൂട്ടിലെ ഈ തപാല്‍പ്പെട്ടിയില്‍ കത്തുകള്‍ നിക്ഷേപിച്ച് വന്നിരുന്നത്. എന്നാല്‍ ഇപ്പോള്‍ ഏത് നിമിഷവും നിലംപതിക്കാവുന്ന നിലയിലാണ് ഇവിടത്തെ തപാല്‍പെട്ടി.
 പെട്ടി സ്ഥാപിച്ചിരുന്ന സ്ഥലത്തിന് ചുറ്റമുള്ള മണ്ണ് റോഡ് വികസനത്തിനും ഓട നിര്‍മാണത്തിനും മറ്റുമായി മാറ്റിയതോടെ ചുവട് അടര്‍ന്നു മാറിയ തപാല്‍പ്പെട്ടി ഒരു മൂലയ്ക്ക് ഒതുക്കിവച്ചിരിക്കുകയാണിപ്പോള്‍.
മുന്‍പ് മണ്ണിനടിയിലായിരുന്ന പെട്ടിയുടെ ഭാഗം ഇപ്പോള്‍ ദ്രവിച്ച് തുടങ്ങിയ നിലയിലാണ്.
മുന്‍പൊക്കെ എല്ലാ പ്രധാന കവലകളിലും തപാല്‍പ്പെട്ടി ഒഴിച്ചുകൂടാനാവാത്ത വസ്തുവായിരുന്നുവെങ്കില്‍ ഇന്ന് അപൂര്‍വ്വമായാണ് തപാല്‍പ്പെട്ടി അവശേഷിക്കുന്നത്. വിവിധിയിടങ്ങളില്‍ നിന്നുപോലും പലരും കത്തുകള്‍ പോസ്റ്റ് ചെയ്യാനായി ആശ്രയിക്കുന്ന വെഞ്ഞാറമൂട്ടിലെ ഈ തപാല്‍പ്പെട്ടിയുടെ അനാഥാവസ്ഥ നാട്ടുകാരില്‍ പ്രതിഷേധത്തിന് കാരണമായിട്ടുണ്ട്.
സുരക്ഷിതമായി തപാലുരുപടികള്‍ ഈ പെട്ടിയില്‍ നിക്ഷേപിക്കാമോയെന്നും ആശങ്ക നാട്ടുകാര്‍ക്കുണ്ട്.
വര്‍ഷങ്ങളായി നാട്ടുകാര്‍ ആശ്രയിക്കുന്ന തപാല്‍പ്പെട്ടി അനുയോജ്യമായ മറ്റൊരിടത്ത് സ്ഥാപിക്കണമെന്നാണ് ആവശ്യം.