അബൂദബി: യുഎഇയില്‍ അടുത്ത ദിവസങ്ങളിലും കടുത്ത വേനല്‍ച്ചൂട് തുടരുമെന്ന് ദേശീയ കാലാവസ്ഥാ കേന്ദ്രം (എന്‍സിഎം) അറിയിച്ചു. ഇന്ന് ഭാഗികമായി മേഘാവൃതമായ കാലാവസ്ഥ അനുഭവപ്പെടുമെങ്കിലും രാത്രിയും നാളെ പുലര്‍ച്ചെയുമായി തീരദേശ, ഉള്‍നാടന്‍ മേഖലകളില്‍ ഈര്‍പ്പം വര്‍ധിക്കുന്നതിനാല്‍ മൂടല്‍മഞ്ഞിനും നേരിയ മഞ്ഞുമൂടലിനും സാധ്യതയുണ്ടെന്ന് അധികൃതര്‍ മുന്നറിയിപ്പ് നല്‍കി.

തെക്കുപടിഞ്ഞാറന്‍ ദിശയില്‍ നിന്ന് വടക്കുപടിഞ്ഞാറന്‍ ദിശയിലേക്കുള്ള മണിക്കൂറില്‍ 10 മുതല്‍ 20 കിലോമീറ്റര്‍ വരെ വേഗതയിലുള്ള കാറ്റ് വീശും. ചില സമയങ്ങളില്‍ കാറ്റിന്റെ വേഗം മണിക്കൂറില്‍ 30 കിലോമീറ്റര്‍ വരെ ഉയരാനും സാധ്യതയുണ്ട്. അറേബ്യന്‍ ഗള്‍ഫിലും ഒമാന്‍ കടലിലും കടല്‍ പൊതുവെ ശാന്തമായിരിക്കുമെന്ന് കാലാവസ്ഥാ കേന്ദ്രം അറിയിച്ചു.

രാജ്യത്തിന്റെ വിവിധ ഭാഗങ്ങളില്‍ ഉയര്‍ന്ന താപനില തുടരുമെന്നാണ് പ്രവചനം. ലിവയില്‍ 46 ഡിഗ്രി സെല്‍ഷ്യസും അല്‍ ഐനിലും ഫുജൈറയിലും 45 ഡിഗ്രി സെല്‍ഷ്യസും അബുദാബിയില്‍ 44 ഡിഗ്രി സെല്‍ഷ്യസും ദുബൈയില്‍ 40 ഡിഗ്രി സെല്‍ഷ്യസും വരെ ഉയരാനിടയുണ്ട്. ദുബൈയില്‍ രാത്രിയോടെ ഹുമിഡിറ്റി 90 ശതമാനം വരെയും മറ്റ് എമിറേറ്റുകളില്‍ 85 ശതമാനം വരെയും ഉയരാന്‍ സാധ്യതയുണ്ട്.

നാളെയും സമാനമായ കാലാവസ്ഥ തുടരുമെന്ന് എന്‍സിഎം അറിയിച്ചു. ഭാഗികമായി മേഘാവൃതമായ ആകാശത്തിനൊപ്പം ഉച്ചയ്ക്ക് ശേഷം കിഴക്കന്‍ മേഖലകളില്‍ മേഘങ്ങള്‍ രൂപപ്പെടാന്‍ സാധ്യതയുണ്ട്. നാളെ രാത്രിയും ബുധനാഴ്ച പുലര്‍ച്ചെയുമായി വീണ്ടും തീരദേശ, ഉള്‍നാടന്‍ പ്രദേശങ്ങളില്‍ മൂടല്‍മഞ്ഞ് അനുഭവപ്പെടാം.

ബുധനാഴ്ച കിഴക്കന്‍ മേഖലകളില്‍ ഉച്ചയ്ക്കുശേഷം ഇടിമേഘങ്ങള്‍ രൂപപ്പെടാന്‍ സാധ്യതയുണ്ട്. രാജ്യത്തിന്റെ വടക്കന്‍ ഭാഗങ്ങളില്‍ താപനില നേരിയ തോതില്‍ ഉയരാനും സാധ്യതയുണ്ട്. ചിലയിടങ്ങളില്‍ മണിക്കൂറില്‍ 40 കിലോമീറ്റര്‍ വരെ വേഗതയില്‍ കാറ്റ് വീശുകയും തുറസ്സായ പ്രദേശങ്ങളില്‍ പൊടിക്കാറ്റിന് സാധ്യതയുണ്ടാകുകയും ചെയ്യും.

വ്യാഴാഴ്ചയും സമാനമായ കാലാവസ്ഥ തുടരുമെന്നാണ് പ്രവചനം. അറേബ്യന്‍ ഗള്‍ഫിലും ഒമാന്‍ കടലിലും കടല്‍ പൊതുവെ ശാന്തമോ നേരിയ തിരമാലകളോടെയോ ആയിരിക്കും.

English Summary: UAE will continue to experience hot summer weather over the coming days, with temperatures reaching up to 46°C. The National Cetnre of Meteorology has also forecast humid nights, possible fog or mist in coastal and inland areas, and gutsy winds reaching up to 40 km/h later this week.