കരിന്തളം: കരിന്തളം വേളൂരിലെ ഇരുനൂറോളം കുടുംബങ്ങള്‍ ഭൂമിയുടെ ക്രയവിക്രയം നടത്താനാകാതെ ദുരിതത്തില്‍. മുന്‍പ് കരിന്തളം വില്ലേജിലായിരുന്ന ഇപ്പോള്‍ ചീമേനി രണ്ട് വില്ലേജിലെ ഇരുന്നൂറോളം കുടുംബങ്ങളാണ് ഭൂമിയുടെ ക്രയവിക്രയം നടത്താനാവാതെ ദുരിതത്തിലായത്.
കിനാനൂര്‍-കരിന്തളം പഞ്ചായത്തില്‍പ്പെട്ട വേളൂരിലെ ഇരുന്നൂറോളം കുടുംബങ്ങളുടെ ഭൂമിയാണ് ആധാരം രജിസ്‌ട്രേഷനില്‍ ഇല്ലാത്ത വില്ലേജില്‍ ഉള്‍പ്പെട്ടിരിക്കുന്നത്. ഇവിടത്തെ സ്ഥലങ്ങള്‍ മുഴുവനും ആധാരം രജിസ്‌ട്രേഷനില്‍ ചീമേനി രണ്ടാം വില്ലേജ് എന്നാണ് രേഖപ്പെടുത്തിയിരിക്കുന്നത്. ഭൂനികുതി അടക്കുന്നത് കരിന്തളം വില്ലേജിലാണെങ്കിലും ഭൂമിയുടെ രജിസ്‌ട്രേഷന്‍ ഉള്‍പ്പെടെയുള്ള കാര്യങ്ങള്‍ നടത്തുന്നത് ഇതുവരെ തൃക്കരിപ്പൂര്‍ സബ് രജിസ്ട്രാര്‍ ഓഫിസിന്റെ കീഴിലായിരുന്നു. എന്നാല്‍ ഹൊസ്ദുര്‍ഗ് താലൂക്ക് വിഭജിച്ച് വെള്ളരിക്കുണ്ട് താലൂക്ക് നിലവില്‍ വന്നതോടെ കിനാനൂര്‍-കരിന്തളം പഞ്ചായത്ത് വെള്ളരിക്കുണ്ട് താലൂക്കിന്റെ പരിധിയില്‍ വന്നു. ഇതോടെയാണ് വേളൂരിലെ ജനങ്ങള്‍ ദുരിതത്തിലായത്. ബാങ്ക് വായ്പ എടുക്കാനും ഭൂമി ക്രയവിക്രയം നടത്താനും കഴിയാത്ത അവസ്ഥയിലാണ് ഇവിടത്തുകാര്‍.
വെള്ളരിക്കുണ്ട് താലൂക്ക് നിലവില്‍ വന്നതോടെ ചീമേനി രണ്ടാം വില്ലേജില്‍ ഉള്‍പ്പെട്ട കരിന്തളം വില്ലേജിലെ വേളൂര്‍ ഉള്‍പ്പെടെയുള്ള സ്ഥലത്തെ ക്രയവിക്രയങ്ങള്‍ നടത്താനാവില്ലെന്നാണ് തൃക്കരിപ്പൂര്‍ സബ് രജിസ്ട്രാര്‍ ഓഫിസര്‍ അധികൃതര്‍ പറയുന്നത്. എന്നാല്‍ ഈ സ്ഥലം ഹൊസ്ദുര്‍ഗ് താലൂക്കില്‍ ചീമേനി രണ്ടാം വില്ലേജ് എന്ന് രേഖപ്പെടുത്തിയതിനാല്‍ ഇവിടെ ക്രയവിക്രയങ്ങള്‍ നടത്താന്‍ കഴിയില്ലെന്ന് വെള്ളരിക്കുണ്ട് സബ് രജിസ്ട്രാര്‍ ഓഫിസ് അധികൃതരും പറയുന്നു. ഇതു സംബന്ധിച്ചു വ്യക്തമായ ഒരു നിര്‍ദേശവും കിട്ടിയിട്ടില്ലെന്ന് ഹൊസ്ദുര്‍ഗ് സബ്‌രജിസ്ട്രാര്‍ ഓഫിസും പറയുന്നു.
അതിനാല്‍ ചീമേനി രണ്ട് വില്ലേജിലെ ആള്‍ക്കാര്‍ എന്തു ചെയ്യണമെന്നറിയാത്ത അവസ്ഥയിലാണ്.
ഇതു സംബന്ധിച്ചു വ്യക്തമായ മാനദണ്ഡങ്ങളുണ്ടാക്കണമെന്നാവശ്യപ്പെട്ട് റവന്യു വകുപ്പ് മന്ത്രിക്കും കലക്ടര്‍ക്കും കിനാനൂര്‍-കരിന്തളം മണ്ഡലം കോണ്‍ഗ്രസ് പ്രസിഡന്റ് ഉമേശന്‍ വേളൂര്‍ നിവേദനം നല്‍കിയിട്ടുണ്ട്.