ലണ്ടന്‍: ഇംഗ്ലീഷ് പ്രീമിയര്‍ ലീഗ് കിരീടം ചെല്‍സിക്ക്. വെസ്റ്റ് ബ്രോമിനെതിരായ പോരാട്ടത്തില്‍ മറുപടിയില്ലാത്ത ഒറ്റ ഗോളിന് വിജയിച്ചാണ് ചെല്‍സി കിരീടമുറപ്പിച്ചത്. മൂന്ന് സീസണിനിടെ ചെല്‍സി സ്വന്തമാക്കുന്ന രണ്ടാം കിരീടവും മൊത്തത്തില്‍ ആറാം പ്രീമിയര്‍ ലീഗ് ചാംപ്യന്‍ പട്ടവുമാണിത്. ആദ്യ പകുതിയും രണ്ടാം പകുതിയുടെ അവസാനവും വരെ ഗോളടിക്കാന്‍ സാധിക്കാതെ കുഴങ്ങിയ ചെല്‍സിയെ 82ാം മിനുട്ടില്‍ വല ചലിപ്പിച്ച് ബാറ്റ്ഷുവായിയാണ് വിജയിപ്പിച്ചത്. ലീഗില്‍ രണ്ട് മത്സരങ്ങള്‍ അവശേഷിക്കേയാണ് 36 മത്സരങ്ങളില്‍ നിന്ന് 28 വിജയവും മൂന്ന് സമനിലയും അഞ്ച് തോല്‍വിയുമായി 87 പോയിന്റോടെ ചെല്‍സി കിരീടം ഉറപ്പിച്ചത്. രണ്ടാം സ്ഥാനത്തുള്ള ടോട്ടനത്തിന് 35 മത്സരങ്ങളില്‍ നിന്ന് 77 പോയിന്റും മൂന്നാമതുള്ള മാഞ്ചസ്റ്റര്‍ സിറ്റിക്ക് 72 പോയിന്റുമാണുള്ളത്. പ്രീമിയര്‍ ലീഗ് കിരീടത്തിനൊപ്പം എഫ്.എ കപ്പ് ചാംപ്യന്‍ പട്ടവും ലക്ഷ്യമിടുന്ന ചെല്‍സി ഈ മാസം 27ന് നടക്കുന്ന ഫൈനലില്‍ ആഴ്‌സണലുമായി ഏറ്റുമുട്ടും. ആദ്യമായി പ്രീമിയര്‍ ലീഗില്‍ പരിശീലകനായി അരങ്ങേറിയ അന്റോണിയോ കോണ്ടെ കിരീട നേട്ടത്തോടെ ഇംഗ്ലണ്ടിലേക്കുള്ള വരവ് അവിസ്മരണീയമാക്കി. 

ഇന്നലെ നടന്ന മറ്റു മത്സരങ്ങളില്‍ മാഞ്ചസ്റ്റര്‍ സിറ്റി ലെയ്സ്റ്റര്‍ സിറ്റിയെ 2-1ന് പരാജയപ്പെടുത്തി പോയിന്റ് പട്ടികയില്‍ മൂന്നാം സ്ഥാനത്തേക്ക് കയറി. ഡേവിഡ് സില്‍വ, ഗബ്രിയേല്‍ ജീസസ് എന്നിവരാണ് സിറ്റിക്കായി വല ചലിപ്പിച്ചത്. എവര്‍ട്ടന്‍ 1-0ത്തിന് വാട്‌ഫോര്‍ടിനെ വീഴ്ത്തി. സ്വാന്‍സീ സിറ്റി 2-0ത്തിന് സണ്ടര്‍ലാന്‍ഡിനേയും സതാംപ്ടന്‍ 2-1ന് മിഡ്ഡ്ല്‍സ്‌ബ്രോയേയും ബേണ്‍മൗത്ത് ഇതേ സ്‌കോറിന് ബേണ്‍ലിയേയും പരാജയപ്പെടുത്തി.