കോഴിക്കോട്: മുത്വലാഖ് സംബന്ധിച്ച വാദംകേള്‍ക്കുന്നതിനിടെ സുപ്രിംകോടതി നടത്തിയ പരാമര്‍ശങ്ങള്‍ അനുചിതമാണെന്ന് സമസ്ത കേരള ഇസ്‌ലാംമത വിദ്യാഭ്യാസ ബോര്‍ഡ് നിര്‍വാഹക സമിതി യോഗം അഭിപ്രായപ്പെട്ടു.
വിശുദ്ധ ഇസ്‌ലാമിക ശരീഅത്തുമായി ബന്ധപ്പെട്ട വിവാഹം, വിവാഹമോചനം തുടങ്ങിയ കാര്യങ്ങളില്‍ പരാതികള്‍ പരിശോധിക്കുന്ന കോടതികള്‍ നടത്തുന്ന പരാമര്‍ശങ്ങള്‍ വിശ്വാസികളെ വേദനിപ്പിക്കുന്നതാണ്. മുത്വലാഖ് എന്താണെന്ന് മനസിലാക്കാതെയാണ് പലരും അഭിപ്രായപ്രകടനം നടത്തുന്നത്. ഇന്ത്യന്‍ ഭരണഘടന രാജ്യത്തെ പൗരന് നല്‍കുന്ന മൗലികാവകാശങ്ങളുടെ ലംഘനം ഒരിക്കലും വെച്ചുപൊറുപ്പിക്കില്ല. ഏകസിവില്‍ കോഡ് നടപ്പാക്കാനുള്ള നീക്കങ്ങള്‍ക്ക് ആക്കംകൂട്ടാനാണ് ഇത്തരം വാദങ്ങളുമായി ചിലര്‍ മുന്നോട്ടുവരുന്നത്. ശരീഅത്ത് സംരക്ഷിക്കുന്നതിന് ഏതറ്റംവരെ പോകാനും ഇന്ത്യന്‍ മുസ്‌ലിംകള്‍ പ്രതിജ്ഞാബദ്ധരാണെന്നും മറിച്ചുള്ള എല്ലാ നീക്കങ്ങളും ചെറുത്തുതോല്‍പ്പിക്കുമെന്നും യോഗം മുന്നറിയിപ്പു നല്‍കി.
സമസ്ത കേരള ജംഇയ്യത്തുല്‍ ഉലമാ ജനറല്‍ സെക്രട്ടറി പ്രൊഫ. കെ. ആലിക്കുട്ടി മുസ്‌ലിയാര്‍ അധ്യക്ഷനായി. സമസ്ത വിദ്യാഭ്യാസ ബോര്‍ഡ് ജനറല്‍ സെക്രട്ടറി എം.ടി അബ്ദുല്ല മുസ്‌ലിയാര്‍ സ്വാഗതം പറഞ്ഞു. കെ.ടി ഹംസ മുസ്‌ലിയാര്‍, ഡോ. ബഹാഉദ്ദീന്‍ മുഹമ്മദ് നദ്‌വി, കെ. ഉമര്‍ ഫൈസി, എ.വി അബ്ദുറഹ്മാന്‍ മുസ്‌ലിയാര്‍, ഡോ. എന്‍.എ.എം അബ്ദുല്‍ഖാദിര്‍, ടി.കെ പരീക്കുട്ടി ഹാജി, എം.സി മായിന്‍ഹാജി, ഹാജി, കെ. മമ്മദ് ഫൈസി, കെ.എം അബ്ദുല്ല മാസ്റ്റര്‍, ഒ. അബ്ദുല്‍ഹമീദ് ഫൈസി, ഇ. മൊയ്തീന്‍ ഫൈസി പുത്തനഴി, പി.എ ജബ്ബാര്‍ ഹാജി, പിണങ്ങോട് അബൂബക്കര്‍ സംസാരിച്ചു. മാനേജര്‍ കെ. മോയിന്‍കുട്ടി മാസ്റ്റര്‍ നന്ദി പറഞ്ഞു.