ജിദ്ദ: സഊദിയില്‍ പന്ത്രണ്ട് മേഖലയിലെ സ്വദേശിവത്കരണത്തിന്റെ ഭാഗമായുള്ള പരിശോധന രാജ്യവ്യാപകമായി തുടരുന്നു.

വിവിധ പ്രവിശ്യകളില്‍ സ്വദേശിവത്കരണം ബാധകമാകുന്ന മിക്ക കടകളും കഴിഞ്ഞ ദിവസവും അടച്ചിട്ട നിലയിലാണ്. അതേ സമയം വില്‍ക്കാന്‍ പാടില്ലാത്ത വസ്തുക്കള്‍ മാറ്റി വെച്ചാണ് ചിലര്‍ കടകള്‍ തുറന്നത്.

അതേ സമയം തൊഴില്‍ സാമൂഹികവികസനമന്ത്രാലയത്തിന്റെയും സുരക്ഷാവിഭാഗത്തിന്റെയും നേതൃത്വത്തില്‍ നടത്തിയ പരിശോധനയില്‍ ഇതുവരെ 66 നിയമലംഘനങ്ങള്‍ ആണ് കണ്ടെത്തിയത്.

രാജ്യത്തെ എല്ലാ നഗരങ്ങളിലും ഗ്രാമങ്ങളിലും പരിശോധന നടത്തിയ തൊഴില്‍ മന്ത്രാലയം നിയമം ലംഘിച്ച സ്ഥാപനങ്ങള്‍ക്ക് പിഴ ചുമത്തുകയും ചിലതിന് താക്കീത് നല്‍കുകയുമാണ് ചെയ്യുന്നത്.

വ്യവസ്ഥകള്‍ പാലിക്കാതെ പ്രവര്‍ത്തിച്ച ചില കടകള്‍ മന്ത്രാലയം അടപ്പിച്ചു. ഇവയുടെ ചിത്രങ്ങള്‍ സഹിതം മന്ത്രാലയം ട്വിറ്ററിലൂടെ പുറത്ത് വിടുന്നുണ്ട്.

റിയാദില്‍ പരിശാധന നടത്തിയത് 99 കടകളിലാണെന്നും അതില്‍ 16 സ്ഥാപനങ്ങള്‍ക്ക് പിഴ ചുമത്തിയതായും അധികൃതര്‍ അറിയിച്ചു. ബുറൈദ, അസീര്‍, മദീന, ഹാഇല്‍, അറാര്‍, റഫ, താരിഫ്, ജൗഫ്, മദീന, ബദര്‍ തുടങ്ങിയ സ്ഥലങ്ങളില്‍ പരിശാധന നടത്തിയതായും തൊഴില്‍ മന്ത്രാലയം അറിയിച്ചു.

അതിനിടെ ടെക്‌സ്‌റ്റൈല്‍ മേഖലയിലെ മലയാളിക്കടകള്‍ റെഡിയമെയ്ഡ് വസ്ത്രങ്ങള്‍ മാറ്റി വെച്ചാണ് വില്‍പന നടത്തുന്നത്. തുണിത്തരങ്ങള്‍ക്ക് സ്വദേശിവത്കരണം ബാധകമാണോ എന്നത് മന്ത്രാലയത്തിന്റെ കരടില്‍ നിന്നും വ്യക്തമല്ല.

അതേസമയം സ്ഥാപനത്തിന് ലഭിച്ച ലൈസന്‍സിലുള്ള വസ്തുക്കള്‍ മാത്രമേ കടയില്‍ വില്‍ക്കാവൂ. ഇതല്ലാത്തവ കണ്ടെത്തിയാല്‍ പിഴയും നിയമ നടപടിയും ഉണ്ടാകുമെന്ന് തൊഴില്‍ മന്ത്രാലയം മുന്നറിയിപ്പ് നല്‍കി.

ഇഖാമയിലല്ലാത്ത ജോലി ചെയ്യുന്നവരെ കസ്റ്റഡിയിലെടുക്കുന്നതും തുടരുന്നു.
എന്നാല്‍ സ്വദേശിവത്കരണം നടപ്പിലാക്കി നാലു ദിവസം പിന്നിട്ടപ്പോള്‍ തന്നെ പരിശാധന കര്‍ശനമായിരിക്കുകയാണ്.

അതിനിടെ ആദ്യ ദിനങ്ങളില്‍ അടഞ്ഞു കിടന്ന വിദേശികളുടെ കടകള്‍ പല പ്രവിശ്യകളിലും കഴിഞ്ഞ ദിവസം മുതല്‍ ഭാഗികമായി പ്രവര്‍ത്തിച്ചു. പല കടകളും തുറന്നു വെച്ചതല്ലാതെ അവിടെ തൊഴിലാളികളെ കാണാനില്ലായിരുന്നു. എന്നാല്‍ രാത്രിയില്‍ മിക്ക കടകളും സജീവമാവുന്നുണ്ട്. അതിനിടെ ചില കടകള്‍ അടച്ച് സാധനങ്ങള്‍ പുറത്തിട്ട് വമ്പിച്ച ആദായത്തിന് വില്‍ക്കുന്നുമുണ്ട്.