ന്യൂഡല്‍ഹി: പാര്‍ലമെന്റ് ദൃശ്യങ്ങള്‍ പകര്‍ത്തി ഫേസ്ബുക്കില്‍ പോസ്റ്റിട്ട്  എ.എ.പി എം.പി വിവാദത്തില്‍പെട്ടതിനു പിറകേ, മറ്റു രണ്ടു കേസുകളിലായി രണ്ടു എ.എ.പി എം.എല്‍.എമാര്‍ അറസ്റ്റിലായി. ഖുര്‍ആന്‍ കീറിയെറിഞ്ഞു സംഘര്‍ഷത്തിനു വഴിവച്ചെന്ന കേസില്‍ നരേഷ് യാദവ് എം.എല്‍.എയും സ്ത്രീയെ അപായപ്പെടുത്താന്‍ ശ്രമിച്ചെന്ന കേസില്‍ അമാനത്തുല്ലാ ഖാന്‍ എം.എല്‍.എയുമാണ് അറസ്റ്റിലായത്.
ഇരുവരും ഡല്‍ഹി നിയമസഭയിലെ എ.എ.പി സാമാജികരാണ്. നരേഷ് യാദവിനെ പഞ്ചാബ് പൊലിസും അമാനത്തുല്ലാ ഖാനെ ഡല്‍ഹി പൊലിസുമാണ് അറസ്റ്റ് ചെയ്തത്. കഴിഞ്ഞ മാസം 25നു മലേര്‍കോട്‌ലയില്‍ ഖുര്‍ആന്‍ കീറിയെറിഞ്ഞ സംഭവത്തില്‍ അറസ്റ്റിലായ മുഖ്യപ്രതി വിജയ്കുമാര്‍ മെഹ്‌റോളി എം.എല്‍.എയ്‌ക്കെതിരേ മൊഴി നല്‍കിയിരുന്നു. ഒരു സ്ത്രീയുടെ പരാതിയെ തുടര്‍ന്നാണ് അമാനത്തുല്ലാ ഖാന്‍ അറസ്റ്റിലായത്. ഡല്‍ഹി വഖ്ഫ് ബോര്‍ഡ് അധ്യക്ഷന്‍ കൂടിയാണ് അമാനത്തുല്ലാ ഖാന്‍.