റിയാദ്: യമനുമായി അതിര്‍ത്തി പങ്കിടുന്ന നജ്‌റാനിലേക്ക് യമനിലെ വിമതവിഭാഗമായ ഹൂതികള്‍ വീണ്ടും മിസൈലാക്രമണം നടത്തി. വ്യാഴാഴ്ച രാവിലെയും വൈകിട്ടുമാണ് ഹൂതിവിമതരുടെ മിസൈലാക്രമണമുണ്ടായത്. വ്യാഴാഴ്ച രാവിലെ നജ്‌റാന്‍ ലക്ഷ്യമാക്കി ഹൂതികള്‍ റോക്കറ്റാക്രമണവും നടത്തിയതായി സഊദി വാര്‍ത്താ ഏജന്‍സി റിപ്പോര്‍ട്ട് ചെയ്തു. റോക്കറ്റാക്രമണത്തില്‍ സഊദി വനിതക്ക് പരുക്കേറ്റതായി സിവില്‍ ഡിഫന്‍സ് നജ്‌റാന്‍ മേഖലാ വക്താവ് ക്യാപ്റ്റന്‍ അബ്ദുല്‍ഖാലിഖ് അല്‍ ഖഹ്താനി പറഞ്ഞു. പരുക്കേറ്റ യുവതിയെ ആശുപത്രിയിലേക്ക് മാറ്റി. വൈകിട്ട് നടന്ന ബാലിസ്റ്റിക് മിസൈലാക്രമണത്തില്‍ ആര്‍ക്കും പരുക്കില്ല. മിസൈല്‍ ആകാശത്തു വച്ചുതന്നെ തകര്‍ക്കാനായതിനാല്‍ അപകടംകൂടാതെ രക്ഷപ്പെടുകയായിരുന്നു.