വാഷിങ്ടണ്‍: ചൈനയുമായി വ്യാപാര കരാറുണ്ടാക്കാന്‍ അമേരിക്കയ്ക്കുമേല്‍ സമ്മര്‍ദമൊന്നുമില്ലെന്ന് യു.എസ് പ്രസിഡന്റ് ഡൊണാള്‍ഡ് ട്രംപ്. മൂന്നാംഘട്ട തീരുവ നടപ്പാക്കുന്നതു തടയാന്‍ ഇരു രാജ്യങ്ങളും ഉടന്‍ ചര്‍ച്ച ആരംഭിക്കുമെന്ന വാര്‍ത്തകളോട് പ്രതികരിക്കുകയായിരുന്നു ട്രംപ്. ചര്‍ച്ചയെ സ്വാഗതം ചെയ്ത് ചൈന രംഗത്തെത്തിയിരുന്നു.
ചൈനയുമായി കരാറിലേര്‍പ്പെടാന്‍ അമേരിക്കയ്ക്കുമേല്‍ ഒരു സമ്മര്‍ദവുമില്ല. എന്നാല്‍, തങ്ങളുമായി കരാറുണ്ടാക്കാന്‍ അവര്‍ക്കാണു സമ്മര്‍ദമുള്ളത്. തങ്ങളുടെ മാര്‍ക്കറ്റ് ശക്തിപ്പെട്ടുകൊണ്ടിരിക്കുകയാണ്. ചൈനയുടേത് തകര്‍ന്നടിഞ്ഞുകൊണ്ടിരിക്കുകയും ചെയ്യുന്നു-ട്രംപ് ട്വീറ്റ് ചെയ്തു. ചൈനയില്‍നിന്നുള്ള മുഴുവന്‍ ഇറക്കുമതി ചരക്കുകള്‍ക്കും രണ്ടു ഘട്ടങ്ങളിലായി അമേരിക്ക തീരുവ ചുമത്തിയിരുന്നു.