ന്യൂഡല്‍ഹി: ദുബൈയില്‍ നിന്ന് മുംബൈയിലേക്ക് പുറപ്പെട്ട ഇന്‍ഡിഗോ വിമാനം അടിയന്തരമായി നിലത്തിറക്കി. വിമാനത്തില്‍ പുക കണ്ടതിനെ തുടര്‍ന്നാണ് വിമാനം രാജ്‌കോട്ട് രാജ്യാന്തര വിമാനത്താവളത്തില്‍ അടിയന്തരമായി ഇറക്കിയത്. 

194 യാത്രക്കാരുമായി പുറപ്പെട്ട 6ഇ 1452 വിമാനമാണ് അടിയന്തര ലാന്‍ഡിങ് നടത്തിയത്. 

മുന്‍കരുതലിന്റെ ഭാഗമായി പൊലിസും അഗ്‌നിശമന സേനാംഗങ്ങളും ആംബുലന്‍സുകളും സജ്ജമാക്കി നിര്‍ത്തിയിരുന്നു. വിമാനം സുരക്ഷിതമായി ലാന്‍ഡ് ചെയ്തുവെന്നും യാത്രക്കാരെ എല്ലാവരെയും സുരക്ഷിതമായി വിമാനത്തില്‍ നിന്ന് ഒഴിപ്പിച്ചുവെന്നും അധികൃതര്‍ അറിയിച്ചു. 

പുക ശ്രദ്ധയില്‍പ്പെട്ടതിന് പിന്നാലെ പൈലറ്റ് രാജ്‌കോട്ട് എയര്‍ ട്രാഫിക് കണ്‍ട്രോളറുമായി ബന്ധപ്പെടുകയും അടിയന്തര ലാന്‍ഡിംഗിന് അനുമതി തേടുകയുമായിരുന്നു.