വെഞ്ഞാറമൂട്: വെഞ്ഞാറമൂട്ടിലെ മത്സ്യ മൊത്തവ്യാപാരകേന്ദ്രത്തില്‍ തീപിടുത്തം. നൂറ്കണക്കിന് മീന്‍പെട്ടികള്‍ കത്തിനശിച്ചു. ആറ്‌ലക്ഷത്തിലധികം രൂപയുടെ നഷ്ടം. ഇന്നലെ വൈകിട്ട് നാലുമണിയോടെയാണ് തീപിടിത്തമുണ്ടായത്. കിഴക്കേറോഡില്‍ സ്വകാര്യ ബസ്സ്റ്റാന്‍ഡിനായുള്ള സ്ഥലത്താണ് മത്സ്യമൊത്തവില്‍പ്പന കേന്ദ്രം ഇപ്പോള്‍ പ്രവര്‍ത്തിച്ച് വരുന്നത്.
മത്സ്യ മൊത്തവില്‍പ്പനക്കാരുടെ നൂറ്കണക്കിന് പെട്ടികളാണ് ഇവിടെ സൂക്ഷിച്ചിരിക്കുന്നത്. വെഞ്ഞാറമൂട് ടൗണിലെയും പരിസരങ്ങളിലെയും മാലിന്യങ്ങള്‍ നെല്ലനാട് പഞ്ചായത്തിന്റെ ട്രാക്ക്ടറില്‍ ശേഖരിച്ചിച്ച് ഇതിന് സമീപത്തായാണ് നിക്ഷേപിച്ച് വന്നിരുന്നത്.
ഇന്നലെയും ഉച്ചയോടെ മാലിന്യങ്ങള്‍ കൊണ്ട് വന്ന് ഇവിടെ നിക്ഷേപിച്ച് കത്തിച്ചിരുന്നു. നാലുമണിയോടെ ഇതില്‍ നിന്ന് തീ സമീപത്തെ മീന്‍പെട്ടികളിലേക്ക് കത്തിപടരുകയായിരുന്നു. നൂറുകണക്കിന് പെട്ടികള്‍ ഇരുകിയും തീപിടിച്ചും നശിച്ചു.
നാട്ടുകാര്‍ അറിയിച്ചതിനെ തുടര്‍ന്ന് വെഞ്ഞാറമൂട് പൊലിസും ഫയര്‍ഫോഴ്‌സും സ്ഥലത്തെത്തി തീയണയ്ക്കുകയായിരുന്നു.
ആറ്‌ലക്ഷത്തോളം രൂപയുടെ നഷ്ടം സംഭവിച്ചതായാണ് മീന്‍കച്ചവടക്കാര്‍ പറയുന്നത്.